ធ្លាប់តែមានរញ្ជួយផែនដីនិងរញ្ជួយភពអង្គារ ពេលនេះអ្នកវិទ្យាសាស្ត្របង្ហាញថា ក៏មានរញ្ជួយព្រះអាទិត្យដែរ

បរទេស៖ គេធ្លាប់ដឹងថាមានការរញ្ជួយនៅលើផែនដីនិងនៅលើភពអង្គារ ប៉ុន្តែព្រះអាទិត្យរបស់យើងក៏លេចចេញសកម្មភាពដែលបណ្ដាលឲ្យមានការរញ្ជួយព្រះអាទិត្យដែរ។ ការស្រាវជ្រាវរបស់អង្គការណាសាបានទម្លាយអាថ៌កំបាំងកាន់តែច្រើនទាក់ទងនឹងព្រឹត្តិការណ៍ និងដើមកំណើតរបស់ព្រះអាទិត្យ។

ដូចព្រឹត្តិការណ៍រញ្ជួយផែនដីដែលបញ្ចេញកម្លាំងសូរសាស្ត្រក្នុងទម្រង់ជារលកអង្កាញ់ វាបានកើតមាននៅលើផ្ទៃរបស់ព្រះអាទិត្យ ប្រៀបដូចរលកនៅលើផ្ទៃទឹក ក្នុងរយៈពេលប៉ុន្មាននាទីជាមួយនឹងអណ្ដាតភ្លើងរបស់ព្រះអាទិត្យ ដែលផ្ទុះពន្លឺ កម្លាំង និងសារធាតុដែលអាចមើលឃើញនៅផ្ទៃផ្នែកខាងក្រៅនៃបរិយាកាសរបស់ព្រះអាទិត្យ នេះបើយោងតាមសេចក្ដីថ្លែងការណ៍របស់អង្គការណាសា។

ដំបូងឡើយ ក្រុមអ្នកស្រាវជ្រាវគិតថាការរញ្ជួយព្រះអាទិត្យកើតឡើងដោយកម្លាំងរុញច្រានពីបរិយាកាសខាងក្រៅរបស់ព្រះអាទិត្យ ប៉ុន្តែយានអង្កេតរបស់ណាសា Solar Dynamics Observatory (SDO) បានចាប់បានទិន្នន័យនៅពេលវាក្រឡេកឃើញសកម្មភាពនៃការរញ្ជួយព្រះអាទិត្យ ជាមួយរលកអង្កាញ់យ៉ាងចម្លែកលេចចេញពីអណ្ដាតភ្លើងខ្លាំងល្មម នៅក្នុងឆ្នាំ២០១១។ ឧបករណ៍ពីយាន SDO រួមមាន Helioseismic និង Magnetic Imager អាចតាមដានរលកពីការរញ្ជួយព្រះអាទិត្យទៅកាន់តំបន់១,១៣០គីឡូម៉ែត្រខាងក្រោមផ្ទៃព្រះអាទិត្យ។

ក្រុមអ្នកស្រាវជ្រាវទើបតែបានចុះផ្សាយការរកឃើញនេះ នៅចុងឆ្នាំ២០២០។ យ៉ាងណាក៏ដោយ ក៏ក្រុមអ្នកវិទ្យាសាស្ត្រនៅមិនទាន់អាចកំណត់បានថា តើការរញ្ជួយនៅលើព្រះអាទិត្យកើតឡើងដោយសារអ្វីនៅឡើយ ប៉ុន្តែលទ្ធផលថ្មីៗនេះអាចនឹងបង្ហាញតម្រុយនៃដើមកំណើតដែលស្ថិតនៅក្នុងផ្ទៃរបស់ព្រះអាទិត្យ៕