អាជ្ញាធរកុងគោ ​បង្ហាញការព្រួយបារម្ភ ចំពោះមនុស្សដែលបាត់ខ្លួន ជាង៤០នាក់ បន្ទាប់ពីទូកលិចមួយគ្រឿង

កុងគោ៖ មន្ត្រីប្រទេសកុងគោបានប្រាប់ឱ្យដឹងកាលពីថ្ងៃពុធម្សិលមិញនេះថា អាជ្ញាធរនៅភាគខាងកើតប្រទេសកុងគោ បាន​បង្ហាញការព្រួយបារម្ភថាមនុស្សជាង ៤០នាក់ដែលបាត់ខ្លួន គឺអាចនឹងស្លាប់បាត់បង់ជីវិត បន្ទាប់ពីមានហេតុការណ៍លិចទូកមួយ ស្ថិតនៅបឹង Kivu ។

យោងតាមលោក Delphin Birimbi ប្រធានក្រុមសង្គមស៊ីវិលនៅទីក្រុង Kalehe បានឲ្យដឹងថា ក្នុងនោះមាន ៥៦នាក់ ត្រូវបានគេជួយសង្គ្រោះ ហើយសាកសព ៣នាក់ ត្រូវបានរកឃើញ និងមនុស្សជាង ៤០ នាក់ផ្សេងទៀត កំពុងបាត់ខ្លួននៅឡើយ។ លោកបានបន្ថែមថា​ ទូកដែលលិចខាងលើនេះ មានផ្ទុកមនុស្សមិនលើស​ពី ១០០នាក់នោះទេ។

គួរជម្រាបដែរថា គ្រោះមហន្តរាយទូកលិច​នៅប្រទេសកុងគោ គឺ​តែងកើតមានជាញឹកញាប់ ដោយសារកត្តានាវាដាក់មនុស្ស និងទំនិញលើសចំណុះ។​ ម្យ៉ាងវិញទៀត បណ្តាញផ្លូវថ្នល់ក៏​មានការ​លំបាកសំរាប់ធ្វើដំណើរ ហើយជារឿយៗវាស្ថិតនៅក្រោមការវាយប្រហារពីសំណាក់ក្រុមប្រដាប់អាវុធ។ ដូច្នេះទើបមនុស្សនាំគ្នាធ្វើដំណើរតាមផ្លូវទឹកវិញ ទោះបីមានហានិភ័យអាចលង់ទឹកក៏ដោយ៕