ស៊ីរី៖ ទូរទស្សន៍រដ្ឋប្រទេសស៊ីរីបានរាយការណ៍ថា អ៊ីស្រាអែលបានវាយប្រហារជាថ្មីម្តងទៀតមកលើតំបន់ភាគខាងត្បូងនៃប្រទេសស៊ីរីកាលពីថ្ងៃពុធម្សិលមិញនេះ ហើយវាជាការវាយប្រហារលើកទី៣ ក្នុងរយៈពេលជិត ១០ ថ្ងៃមកនេះ ដោយប្រើមីស៊ីលជាច្រើនគ្រាប់បាញ់សំដៅមកលើមូលដ្ឋានរបស់ក្រុមបដិវត្តន៍របស់អ៊ីរ៉ង់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការវាយប្រហារខាងលើនេះ បានកើតឡើងនៅតំបន់ជាយក្រុង al-Kisweh ភាគខាងត្បូងរដ្ឋធានី Damascus ហើយវាគឺជាមូលដ្ឋានយោធាដែលត្រូវបានគ្រប់គ្រងដោយក្រុម Hezbollah នៃប្រទេសលីបង់ គាំទ្រដោយអ៊ីរ៉ង់។
អ្នកនាំពាក្យយោធាមួយរូបបានប្រាប់ឱ្យដឹងថា មីស៊ីលដែលហោះកាត់តំបន់ Golan Heights បានតម្រង់គោលដៅមកលើទីតាំងជាច្រើនកន្លែងក្នុងប្រទេសស៊ីរី ហើយប្រព័ន្ធការពារដែនអាកាសក្នុងប្រទេសស៊ីរី ក៏បានបាញ់ទម្លាក់មីស៊ីលទាំងនោះជាច្រើនគ្រាប់ផងដែរ។
គួរជម្រាបដែរថា ចំពោះការវាយប្រហារខាងលើនេះ គឺនៅមិនទាន់មានការអត្ថាធិប្បាយពីសំណាក់អ្នកនាំពាក្យយោធារបស់អ៊ីស្រាអែលនៅឡើយទេ។ ប៉ុន្តែសេនាធិការកងទ័ពការពារជាតិអ៊ីស្រាអែល លោក Aviv Kochavi បាននិយាយកាលពីខែធ្នូ ឆ្នាំ២០២០កន្លងទៅនេះថា ការវាយប្រហារតាមអាកាសរបស់អ៊ីស្រាអែលបានកាត់បន្ថយមូលដ្ឋានរបស់អ៊ីរ៉ង់នៅក្នុងប្រទេសស៊ីរី៕