ព្យុងយ៉ាង៖ ប្រព័ន្ធផ្សព្វផ្សាយ KCNA របស់ប្រទេសកូរ៉េខាងជើង បានរាយការណ៍នៅថ្ងៃពុធនេះថា មេដឹកនាំកូរ៉េខាងជើងលោក គីម ជុងអ៊ុន បានលើកឡើងថា ផែនការសេដ្ឋកិច្ចរយៈពេល ៥ ឆ្នាំរបស់លោក ត្រូវទទួលបរាជ័យស្ទើរតែគ្រប់វិស័យទាំងអស់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនៅក្នុងសេចក្តីផ្តើមនៃសុន្ទរកថា លោក គីម បានគូសបញ្ជាក់ថា ប្រទេសកូរ៉េខាងជើងបានទទួលជោគជ័យលើការពង្រឹងអំណាច ដោយលោកសំដៅទៅលើភាពជឿនលឿនផ្នែកយោធា ដែលមីស៊ីលផ្លោងអន្តរទ្វីបរបស់កូរ៉េខាងជើងបានធ្វើតេស្តជោគជ័យក្នុងឆ្នាំ ២០១៧ ហើយវាមានសមត្ថភាពអាចវាយប្រហារដល់ទឹកដីអាមេរិកបាន។ ប៉ុន្តែគួរឱ្យសោកស្តាយចំពោះផែនការសេដ្ឋកិច្ច ៥ឆ្នាំ ដែលលោក គីម បានដាក់ចេញក្នុងឆ្នាំ២០១៦កន្លងទៅនេះ គឺមិនបានដល់គោលដៅដូចលោកចង់បាននោះទេ។ ដូចនេះហើយលោកបានអំពាវនាវឱ្យកូរ៉េខាងជើង ត្រូវពឹងលើខ្លួនឯងឱ្យកាន់តែខ្លាំងជាងមុន។
លើសពីនេះ លោក គីម បានព្យាយាមជួយជំរុញកំណើនសេដ្ឋកិច្ច និងបង្កើនការផ្គត់ផ្គង់ថាមពលនៅក្នុងប្រទេស ប៉ុន្តែដោយសារការដាក់ទណ្ឌកម្មរបស់អង្គការសហប្រជាជាតិ រួមជាមួយនឹងការផ្ទុះឡើងនៃវីរុសកូវីដ១៩ ក៏ដូចជាទឹកជំនន់ធ្ងន់ធ្ងរផងនោះ ទើបធ្វើឱ្យប្រទេសកូរ៉េខាងជើងពិបាកស្តាសេដ្ឋកិច្ចជាតិ។
គួរជម្រាបដែរថា ជំនួបនយោបាយដ៏កម្រមានមួយនេះ បានទាក់ទាញការចាប់អារម្មណ៍ពីសំណាក់អន្តរជាតិជាច្រើន ស្របពេលលោកត្រូវបានគេរំពឹងថា នឹងបង្ហាញពីផែនការសេដ្ឋកិច្ចរយៈពេល ៥ ឆ្នាំថ្មី ដោយមានដោះស្រាយនូវទំនាក់ទំនងអន្តរកូរ៉េ និងនយោបាយការបរទេស៕