ស្ងាត់ៗ Constance Wu បានផ្តល់កំណើតដល់កូនស្រីយ៉ាងមានក្ដីសុខ នៅសហរដ្ឋអាមេរិក

ហុងកុង៖ យោងតាមការបញ្ជាក់ដោយអ្នកគ្រប់គ្រងរបស់ខ្លួនកាលពីដើមសប្តាហ៍នេះ តួឯកស្រីក្នុងរឿង Crazy Rich Asians នាង Constance Wu បានផ្តល់កំណើតកូនស្រីរបស់នាងយ៉ាងស្ងាត់ស្ងៀមនៅរដូវក្តៅនេះ។ ឪពុករបស់ទារកគឺជាមិត្តប្រុសរបស់នាងឈ្មោះ Ryan Kattner ដែលមានឈ្មោះក្រៅហៅថា Honus Honus ជាតន្ត្រីករនិងជាអ្នកនិពន្ធរឿង។ តារាសម្តែងវ័យ ៣៨ ឆ្នាំរូបនេះមិនដែលប្រកាសពីការមានផ្ទៃពោះរបស់នាងទេ ហើយបានជ្រើសរើសរីករាយនឹងភាពជាម្តាយរយៈពេលពីរបីខែដំបូងឆ្ងាយពីភ្នែកសាធារណៈជន។

Constance កម្រត្រូវបានគេឃើញនៅទីសាធារណៈទេចាប់តាំងពីការបិទដោយសារការរាតត្បាតនៅសហរដ្ឋអាមេរិកក្នុងខែមីនា។ ការបង្ហាញខ្លួនជាសាធារណៈចុងក្រោយរបស់នាងគឺនៅក្នុងខែកុម្ភៈនៅពេលដែលនាងបានចូលរួមក្នុងកម្មវិធីប្រគល់ពានរង្វាន់ Costume Designers Guild Awards និង Queerties ដែលជាពិធីប្រគល់ពានរង្វាន់របស់ LGBTQ ។

ការរស់នៅបែបជីវិតឯកជនក្រៅពីការងារ Constance កម្រនឹងធ្វើបច្ចុប្បន្នភាពគណនីបណ្តាញសង្គមរបស់នាងណាស់ ហើយលើកចុងក្រោយដែលនាងបានធ្វើបច្ចុប្បន្នភាពគណនី Instagram របស់នាងគឺនៅខែឧសភា។

ជាមួយគ្នានេះដែរ តួឯកប្រុសដែលសម្ដែងរួមគ្នាជាមួយនឹង Constance គឺលោក Henry Golding ក៏បានប្រកាសអំពីការមានផ្ទៃពោះរបស់ប្រពន្ធលោកនៅលើបណ្តាញសង្គមកាលពីខែមុន៕

សូមទស្សនារូបភាពខាងក្រោមនេះ៖ 

ប្រភព៖ Jayne Stars