ក្តៅគគុក! អ៊ីរ៉ង់ កំពុងដាក់ដ្រូនជាច្រើនគ្រឿង ធ្វើ​តេស្តសាកល្បង ក្នុងសមយុទ្ធយោធាមួយ (មានវីដេអូ)

តេហេរ៉ង់៖ យោងតាមសារព័ត៌មានរបស់អ៊ីរ៉ង់បានរាយការណ៍​ថា ប្រទេសអ៊ីរ៉ង់បានចាប់ផ្តើមធ្វើ​សមយុទ្ធផ្នែកយោធាជាមួយនឹងដ្រូនដែលផលិតក្នុងស្រុកជាច្រើនគ្រឿងកាលពីថ្ងៃអង្គារម្សិលមិញនេះ បន្ទាប់ពី ២ថ្ងៃនៃគម្រប់ខួបការស្លាប់របស់ឧត្ដមសេនីយ៍កំពូលរបស់អ៊ីរ៉ង់ ដោយសារតែការវាយប្រហារពីសំណាក់ដ្រូនរបស់អាមេរិក។

ជាក់ស្តែង អ៊ីរ៉ង់ និងកងយោធានៅក្នុងតំបន់បានពឹងផ្អែកកាន់តែខ្លាំងឡើងនៅប៉ុន្មានឆ្នាំថ្មីៗនេះទៅលើដ្រូន ក្នុងការវាយប្រហារជាមួយប្រទេសដូចជា យេមែន ស៊ីរី អ៊ីរ៉ាក់ និងនៅចក្រសមុទ្រហូម៉ូហ្ស (Strait of​ Hormuz)។

ទីភ្នាក់ងារព័ត៌មាន semi-official Fars បានប្រាប់ឱ្យដឹងថា កងយោធារបស់អ៊ីរ៉ង់ គឺកំពុងដាក់សាកល្បងដ្រូនជាច្រើនប្រភេទដូចជា ដ្រូន​បំផ្ទុះគ្រាប់បែក ដ្រូនការពារពីគ្រាប់ និង​ដ្រូនយកការណ៍សម្ងាត់ ក្នុងសមយុទ្ធរយៈពេល ២ថ្ងៃនៅកណ្តាលខេត្ត Semnan។ ប្រធានបុគ្គលិកនៃកងកម្លាំងប្រដាប់អាវុធលោក Mohammad Baqeri បានរៀបរាប់ថា កងកម្លាំងប្រដាប់អាវុធរបស់អ៊ីរ៉ង់ គឺបានត្រៀមខ្លួនរួចស្រេច ហើយប្រសិនបើសត្រូវហ៊ានប្រព្រឹត្ដកំហុសតែបន្តិច អ៊ីរ៉ង់នឹងឆ្លើយតបវិញដោយគ្មានប្រណីដៃឡើយ។

គួររម្លឹកដែរថា ប្រទេសអ៊ីរ៉ង់បានអភិវឌ្ឍឧស្សាហកម្មផលិតអាវុធក្នុងស្រុកដ៏ធំមួយ ដោយសារប្រទេសរបស់ខ្លួនរងការដាក់ទណ្ឌកម្មពីអន្តរជាតិ ​ដែលជាហេតុ​ធ្វើឱ្យប្រទេសអ៊ីរ៉ង់ មិនអាចនាំចូលអាវុធបាន៕