អេស្ប៉ាញ៖ ក្លិប Atletico Madrid បានបង្វែរចំណាប់អារម្មណ៍មកលើកីឡាករខ្សែប្រយុទ្ធ Olivier Giroud ដែលកំពុងលេងឲ្យក្លិបតោខៀវ Chelsea ក្នុងបំណងចង់យករូបគេមកជំនួសខ្សែប្រយុទ្ធ Diego Costa ដែលក្លិបទើបតែផ្ដាច់កុងត្រាថ្មីៗបន្ទាប់ពីខ្សែប្រយុទ្ធសញ្ជាតិអេស្ប៉ាញរូបនេះមិនមកហ្វឹកហាត់និងទាមទារឲ្យក្លិបដោះលែងគេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមសារព័ត៌មាន Rai Sport បានរាយការណ៍ថា ដោយសារ Costa ស្រាប់តែចាកចេញភ្លាមៗទើបក្លិបបានដាក់រ៉ាដាសម្លឹងរកមើលអ្នកដែលអាចមកជំនួសកន្លែងគេបានទោះបីក្លិបមានខ្សែប្រយុទ្ធដូចជា Joao Felix និង Luis Suarez ហើយក៏ដោយហើយលោកគ្រូ Diego Simeone ជឿថា Olivier Giroud ជាជម្រើសដ៏សក្តិសមនិងចង់តាមយករូបគេពេលទីផ្សារដោះដូរកីឡាករខែមករាបើកទ្វារ។
កីឡាករវ័យ៣៤ឆ្នាំរូបនេះនឹងដាច់កុងត្រាជាមួយ Chelsea នៅចុងរដូវកាលនេះហើយ ខណៈដែលលោកគ្រូបង្វឹក Frank Lampard មិនសូវដាក់ឲ្យគេចូលលេងប៉ុន្មានទេ ទោះគេរកបានគ្រាប់បាល់ដល់ទៅ៩គ្រាប់ក្នុងរដូវកាលនេះក៏ដោយ។
Giroud ធ្លាប់ទាមទារឲ្យលោកគ្រូ Lampard ដាក់ឲ្យគេចូលលេងញឹកញាប់បើចង់ឲ្យគេស្នាក់នៅ Stamford Bridge បន្តប៉ុន្តែមើលទៅលោកគ្រូមិនសូវជាផ្ដល់ទំនុកចិត្តមកកាន់គេប៉ុន្មានទេអ៊ីចឹងហើយ Giroud អាចនឹងសម្លឹងរកផ្លូវចាកចេញពី Cheslea ព្រោះគេចង់ជាប់ជម្រើស១១នាក់ដំបូងនៅក្រុមជម្រើសជាតិបារាំងដើម្បីបានចូលលេងនៅព្រឹត្តិការណ៍ Euro នោះឯង។
យោងតាមការរាយការណ៍ Chelsea ដូចជាមិនបានបង្ហាញពីបំណងចង់ឲ្យ Giroud ចាកចេញនៅខែក្រោយនេះឡើយ ប៉ុន្តែសាមីខ្លួនអាចនឹងចង់ទៅចូលរួមជាមួយ Atletico Madrid ដែលលេងក្នុងក្របខណ្ឌ La Liga ពេលរដូវកាលថ្មីនេះចប់សព្វគ្រប់ក៏ថាបាន។
Atletico Madrid ធ្វើបានល្អណាស់នៅក្នុងរដូវកាលថ្មីនេះដោយក្រុមកំពុងឈរលើកំពូលតារាង La Liga និងមាន៣២ពិន្ទុក្នុងដៃ។ ខ្សែប្រយុទ្ធឆ្នើមៗរបស់ក្លិបដូចជា Joao Felix រកបាន ៥គ្រាប់ ខណៈ Luis Suarez រកបាន៧គ្រាប់ក្នុងការបង្ហាញខ្លួនត្រឹមតែ១០លើក ហើយបើក្លិបអាចបញ្ចុះបញ្ចូលឲ្យ Olivier Giroud មកចូលរួមជាមួយបាននោះតំបន់ប្រយុទ្ធរបស់ AT Madrid នឹងកាន់តែមុតស្រួច៕
ប្រភព៖ metro