ខ្សែប្រយុទ្ធ AT Madrid ម្នាក់លែងមកហ្វឹកហាត់និងទាមទារឲ្យក្លិបបញ្ចប់កុងត្រារបស់គេ

អេស្ប៉ាញ៖ ខ្សែប្រយុទ្ធ Diego Costa របស់ក្លិប Atletico Madrid មិនបានមកចូលរួមហ្វឹកហាត់ជាមួយក្រុមឡើយដែលកាយវិការនេះបង្ហាញថារូបគេចង់ឲ្យក្លិបផ្ដាច់កុងត្រារបស់គេឲ្យកាន់តែឆាប់កាន់តែល្អខណៈកុងត្រាផុតនៅចុងរដូវកាលនេះហើយ។

កីឡាករសញ្ជាតិអេស្ប៉ាញ រូបនេះបានជូនដំណឹងដល់ក្លិប At Madrid ជាមុនថាគេចង់ចាកចេញពីទឹកដី Wanda Metropolitano មុនពេលទីផ្សារដោះដូរកីឡាករនៅខែមករាបើកទ្វារ និងចង់ឲ្យក្លិបផ្ដាច់កុងត្រាគេមុនកំណត់ទៀតផង។

Costa មិនសូវកាក់កបទេពេលត្រឡប់មកចូលរួមជាមួយ Atetico Madrid វិញក្រោយផ្ទេរទៅលេងនៅទឹកដី Stamford Bridge របស់ Chelsea ក្នុងឆ្នាំ២០១៨ ដោយសារតែគេបានរងរបួសខណៈដែលនៅរដូវកាលនេះគេបានបង្ហាញខ្លួនតែ៧ប្រកួតប៉ុណ្ណោះនិងរកគ្រាប់បាល់បាន២គ្រាប់ក្នុងក្របខណ្ឌ La Liga ។

យោងតាមសារព័ត៌មាន AS បានឲ្យដឹងថា At Madrid ក៏កំពុងសម្លឹងរកទីផ្សារដែលអាចដាក់លក់ Costa ដែរនិងអាចបើកភ្លើងខៀវអនុញ្ញាតឲ្យកីឡាករវ័យ៣២ឆ្នាំរូបនេះចាកចេញពីក្លិបដោយសារពេលនេះខ្សែប្រយុទ្ធ Luis Suarez បានលេងជំនួសកន្លែង Diego Costa ទៅហើយ។

Diego Costa ធ្លាប់បានបង្ហាញទម្រង់លេងដ៏ល្អកាលពីឆ្នាំ២០១៣-២០១៤ដោយបានជួយឲ្យក្រុម At Madrid លើកពាន La Liga មុននឹងផ្ទេរទៅកាន់ទឹកដី Stamford Bridge និងជួយក្រុមឲ្យឈ្នះពាន Premier League ២ដង ហើយចុងក្រោយរូបគេក៏វិលត្រឡប់មកលេងនៅទឹកដី Wanda Metropolitano វិញក្នុងឆ្នាំ២០១៨។

ប៉ុន្តែយោងតាមទូរទស្សន៍អេស្ប៉ាញ Cadena Cope បានបង្ហើបថា ក្លិប Atletico Madrid នឹងផាកពិន័យ Diego Costa ក្នុងចំនួនទឹកប្រាក់ប្រមាណ ២៣លានផោន(ស្មើនឹងប្រមាណ៣១លានដុល្លារ)ប្រសិនបើគេហ៊ានចាកចេញទៅក្លិបទៅចូលរួមជាមួយក្លិបគូប្រជែងពីរធំៗគឺ Real Madrid និង Barcelona ។

Atletico Madrid កំពុងឈរនៅកំពូលតារាង La Liga ដោយមាន ៣២ពិន្ទុក្នុងដៃនិងនៅសល់២ប្រកួតទៀតខណៈដែល Real Madrid ដែលឈរនៅលេខ២មានពិន្ទុស្មើ At Madrid ដែរចំណែក Barcelona ឈរនៅលេខរៀងទី៥ មាន២៤ពិន្ទុ៕

ប្រភព៖ goal