អង់គ្លេស៖ កាលពីយប់ថ្ងៃច័ន្ទឆ្លងចូលថ្ងៃអង្គារកន្លងទៅ ក្លិបតោខៀវ Chelsea បានបើកទ្វារកីឡដ្ឋាន Stamford Bridge ស្វាគមន៍ក្រុមភ្ញៀវ Aston Villa ដែលជាជំនួបក្នុងក្របខណ្ឌ Premier League ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្នុងនោះដែរក្រុមម្ចាស់ផ្ទះលេងបានត្រឹមស្មើ ១-១ ជាមួយក្រុមភ្ញៀវទើបធ្វើឲ្យផ្ទុះពាក្យរិះគន់ជាច្រើនមិនថាទៅលើលោកគ្រូបង្វឹក Frank Lampard ឬ ក្លិប Chelsea ទាំងមូលព្រោះមហាជនភាគច្រើនជឿថា Chelsea ជាក្រុមខ្លាំងមួយដែលមានសិទ្ធិអាចទៅលេងក្នុងពានរង្វាន់ UEFA Champions League វគ្គ១៦ក្រុមចុងក្រោយទៀតផង។
ក្នុងការប្រកួតនេះ លោកគ្រូ Frank Lampard បានដាក់ Antonio Rudiger និង Andreas Christensen ចូលលេងជាខ្សែការពារជំនួស Kurt Zouma ព្រមទាំង Thiago Silva ។ការប្រកួតបើកឆាកគឺខ្សែប្រយុទ្ធ Olivier Giroud រកគ្រាប់បាល់បាន១គ្រាប់ដោយហក់តែតបញ្ចូលទីដោយមានការបញ្ជូនពីខ្សែការពារ Ben Chilwell នាទីទី៣៤ ។
ប៉ុន្តែនៅនាទីទី៥០ ខ្សែបម្រើ Anwar El Ghazi ដាក់មួយជើងស្ដាំបន្ថែមពីលើបាល់ Free Kick ដែលស៊ុតដោយមិត្តរួមក្រុមឲ្យទម្លុះសំណាញ់អ្នកចាំទី Mendy បានសម្រេច។
ដោយឡែក លោក Ian Wright ដែលអតីតកីឡាកររបស់ Arsenal និង West Ham និងបច្ចុប្បន្នជាអ្នកវិភាគនៅទូរទស្សន៍ BBC Sport បានចេញមុខរិះគន់កីឡាករ Chelsea ២នាក់ដែលលោកយល់ឃើញបង្ហាញទម្រង់លេងមិនសូវគាប់ភ្នែកនោះគឺ ខ្សែការពារ Andreas Christensen និងខ្សែបម្រើ N'Golo Kante ។
លោក Ian Wright សង្កេតឃើញពីភាពធ្វេសប្រហែសរបស់ ខ្សែការពារ Andreas Christensen ដែលក្រោយពី Anwar El Ghazi រកបាន១គ្រាប់ឲ្យ Aston Villa តាមស្មើរួច ខ្សែការពាររូបនេះបានប្រទាញប្រទង់ដណ្ដើមគ្រាប់បាល់ជាមួយកីឡាករ Jack Grealish ធ្វើឲ្យពួកគេដួលទាំងពីរនាក់ ខណៈ Jack Grealish ខំប្រឹងងើបបានសម្រេចតែ Christensen បែរជានៅត្រាំត្រែងទាំងដែលអជ្ញាកណ្ដាលប្រកាសឲ្យលេងបន្តទៀតដែលធ្វើឲ្យតំបន់ការពារបែរជាបើកចំហរ គ្មានអ្នកណានៅចាំទប់ខាង Aston Villa ទើបលោកបានថ្លែងរិះគន់ គេរួមជាមួយខ្សែបម្រើ N'Golo Kante ថា៖
ខ្ញុំពិតជាខកចិត្តនឹងរបៀបដែល Christensen លេងណាស់ព្រោះយើងឃើញហើយថា Jack Grealish បានព្យាយាមងើបឡើងវិញតែ Christensen បែរជានៅយឺតយូរ ខ្ញុំមិនចង់ឃើញខ្សែការពារក្រុមទៅដេកដួលលើស្មៅបែបនោះទេ អ្នកឃើញហើយថាមានបញ្ហាច្រើនណាស់ដែលជាមូលហេតុក្លាយជាបែបនេះ។ Kante វិញគេគួរតែព្យាយាមរត់មកឲ្យលឿនជាងមុនបន្តិច ហើយ Cesar Azpilicueta គួរតែប្រុងប្រយ័ត្នឲ្យបានខ្ពស់នឹងការផ្លាស់ទីរបស់ Jack Grealish ហើយចុងក្រោយពួកគេបែរជារកគ្រាប់បាល់បានសម្រេច។
លោក Ian Wright បានថ្លែងបន្តទៀតថា៖
ពួកគេសមគួរនឹងរកគ្រាប់បាល់បាន ប៉ុន្តែបញ្ហាគឺ Christensen គួរតែកុំសម្ពឹក បើ Jack Grealish គេងើបបាន Christensen ក៏គួរតែងើបនិងលេងបន្តបានដូចគ្នា។ ចំណែក Kante ដែលជាខ្សែបម្រើការពារដែលល្អម្នាក់ក្នុងលោកវិញដឹងហើយថា El Ghazi នៅត្រង់ប្រអប់គ្រោះថ្នាក់ ខណៈដែលខ្សែការពារChelsea ផ្សេងទៀតមិនបាននៅត្រង់នោះ អ៊ីចឹងហើយគេគួរតែស្វែងយល់ពីស្ថានការណ៍នេះឲ្យបានរវៀស។
គួររម្លឹកផងដែរថា ខ្សែការពារ Andreas Christensen បង្ហាញខ្លួនឲ្យ Chelsea បាន៥ប្រកួតនារដូវកាលនេះខណៈដែលខ្សែបម្រើ N'Golo Kante បង្ហាញខ្លួនបាន១៦ដងនិងបញ្ជូនបាល់ឲ្យមិត្តរួមក្រុមស៊ុតបាន១ដងទៀត៕
សូមទស្សនាវីដេអូនៃការប្រកួត៖
ប្រភព៖ metro
Bong I.T