អឺរ៉ុប៖ ក្រុមហ៊ុនស្រាបៀរយីហោ Budweiser បានអបអរដល់ខ្សែប្រយុទ្ធសញ្ជាតិអាហ្សង់ទីន Lionel Messi ក្នុងឱកាសដែលរូបគេរកគ្រាប់បាល់បាន៦៤៤គ្រាប់ឲ្យក្លិបអ្នកមានបុណ្យ FC Barcelona ដោយការចែកចាយស្រាបៀររបស់ខ្លួនទៅឲ្យ អ្នកចាំទីទាំងអស់ដែលធ្លាប់របូតគ្រាប់បាល់ឲ្យ Messi ស៊ុតទម្លុះសំណាញ់ទីរបស់ខ្លួន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កាលពីថ្ងៃអង្គារឈានចូលថ្ងៃពុធកន្លងទៅ ប្រធានក្រុម Lionel Messi បានស៊ុតបញ្ចូលទី១គ្រាប់ក្នុងជំនួបរវាង Barcelona ទល់នឹង Valladolid ដែលបានបំបែកកំណត់ត្រាធ្វើឲ្យរូបគេក្លាយជាកីឡាករតែម្នាក់គត់ក្នុងប្រវត្តិសាស្ត្របាល់ទាត់ដែលរកគ្រាប់បាលបាន ៦៤៤ គ្រាប់សម្រាប់ក្លិបមួយ នាំមុខវីរបុរសប្រេស៊ីល Pele ដែលរកបានតែ ៦៤៣ គ្រាប់ឲ្យ Santos ។
ដើម្បីជាការអបអរសមិទ្ធផលដ៏អស្ចារ្យនេះ ក្រុមហ៊ុនស្រាបៀរ Budweiser បានផ្ញើស្រាបៀររបស់ខ្លួនជាពិសេសដល់អ្នកចាំទីទាំងអស់ដែល Messi ធ្លាប់ស៊ុតចូល ដែលចំនួននោះគឺគិតទៅតាមគ្រាប់បាល់ដែល Messi រកបានសម្រាប់អ្នកចាំទីម្នាក់ៗ។ អ្វីដែលកាន់តែពិសេសគឺ នៅលើដបរបស់ស្រាបៀរនោះមានសរសេរលេខតាមចំនួនគ្រាប់បាល់ពី ១ ដល់ ៦៤៤ ក្នុងដបខុសៗគ្នាសរុប ៦៤៤ ដប។
អ្នកចាំទីសញ្ជាតិអ៊ីតាលី Gianluigi Buffon ក៏បានថតរូបជាមួយស្រាបៀរ Budweiser ចំនួន២ដបដែលមានលេខរៀងទី ៥១៤ និង ៥១៥ តំណាងឲ្យគ្រាប់បាល់ដែល Messi ធ្លាប់ស៊ុតចូល២គ្រាប់ក្នុងក្របខណ្ឌ Champions League កាលពីឆ្នាំ២០១៧។
Buffon បានបង្ហោះសាមួយផ្ញើដល់ខ្សែប្រយុទ្ធ Lionel Messi អមជាមួយរូបភាគគេអង្គុយលំហែជាមួយស្រាទាំង២ដបថា៖
@budfootball អរគុណខ្លាំងណាស់សម្រាប់ស្រាបៀរនេះ ខ្ញុំចាត់ទុកថានេះជាកាដូកោតសរសើរទៅចុះ ពួកយើងទាំងពីរនាក់( Buffon និង Messi) បានប្រកួតប្រជែងគ្នាលើវាលស្មៅច្រើនឆ្នាំហើយ!សូមអបអរសាទរដល់ @Leomessi ដែលបានបំបែកកំណត់ត្រាសម្រាប់គ្រាប់បាល់៦៤៤ នេះ វាពិតជាសមិទ្ធផលដ៏មិនគួរឲ្យជឿមែន តោះជល់កែវ!
ភ្នាក់ងារតំណាងរបស់ក្រុមហ៊ុនស្រាបៀរ Budweiserបានថ្លែងថា៖
៦៤៤ គ្រាប់ វាត្រូវនឹង៦៤៤ដប ហើយចំនួនអ្នកចាំទីដែលពួកយើងនឹងផ្ញើទៅគឺមានចំនួន ១៦០នាក់។ Leo Messi បានបញ្ជូនគ្រាប់បាល់នោះលើទីលាន ចំណែកពួកយើងវិញនឹងបញ្ជូនស្រាបៀនោះនៅក្រៅទីលាន អ្នកចាំទីទាំងអស់នឹងទទួលបានចំនួនស្រាតាមចំនួនគ្រាប់ដែល Messi ស៊ុតចូល។
ចំណែកអ្នកចាំទីរបស់ក្លិប Atletico Madrid គឺ Jan Oblak វិញក៏បានទទួលស្រាបៀរយីហោនេះដែរដោយរូបគេធ្លាប់របូតគ្រាប់បាល់ឲ្យ Messi ដល់ទៅ១១គ្រាប់ឯណោះ។Oblak បានថ្លែងប្រាប់ Sky Sports នៅសប្តាហ៍នេះថា៖
គេ( Messi) បានស៊ុតបញ្ចូលទីច្រើនគ្រាប់ណាស់ពេលប៉ះនឹងខ្ញុំ ច្រើនមែនទែន!ប៉ុន្តែគេជាកីឡាករដ៏អស្ចារ្យម្នាក់ ជាកីឡាករដែលល្អបំផុត មានច្រើនដងណាស់ដែលខ្ញុំអង្គុយឆ្ងល់ថាហេតុអី Messi រកគ្រាប់បាល់បានច្រើនម៉្លេះ។
អ្នកចាំទីរូបនេះក៏បានបង្ហោះរូបភាពគេជាមួយដបស្រាដែរដោយសរសេរថា៖
អបអរសាទរទៅលើសមិទ្ធផលដ៏អស្ចារ្យរបស់អ្នក @leomessi ខ្ញុំមិនដែលចង់របូតគ្រាប់បាល់ទេប៉ុន្តែវាចាត់ទុកជាការប្រកួតប្រជែងមួយក្នុងការព្យាយាមបិទសំណាញ់ទីមិនឲ្យអ្នកស៊ុតចូល អរគុណណាស់ដល់ @budfootballl សម្រាប់កាដូដ៏ពិសេសនេះ។
ខណៈនោះដែរអ្នកចាំទីរបស់ក្លិបតោខៀវ Chelsea គឺ Kepa Arrizabalaga ក៏បានថតរូបភាពខ្លួនឯងកាន់ស្រាបៀរដែល ក្រុមហ៊ុន Budweiser ផ្ញើមកឲ្យដែរ ក្រោយរូបគេភ្លាត់របូតគ្រាប់បាល់ឲ្យ Messi កាលកំលុងពេល Barcelona ប៉ះ Athletic Bilbao ដែល Kepa ធ្លាប់លេងឲ្យកាលពី រដូវកាល ២០១៧-២០១៨។
អតីតអ្នកចាំទីរបស់ក្លិប Valencia Diego Alves ក៏ជាអ្នកចាំទីម្នាក់ដែល Messi ធ្លាប់ស៊ុតបានច្រើនគួរសមគឺមានចំនួនដល់ទៅ១៩គ្រាប់ឯណោះ។
អ្វីដែលគួរឲ្យភ្ញាក់ផ្អើលនោះគឺ អតីតអ្នកចាំទីឆ្នើមរបស់ Real Madrid គឺ Iker Casillas ក៏ត្រូវគេរំពឹងទុកថានឹងទទួលបានស្រាបៀរនេះដល់ទៅ ១៧ដប ឯណោះ។
ឯដបស្រាលេខរៀងចុងក្រោយគេគឺលេខទី ៦៤៤ បានទៅលើអ្នកចាំទីរបស់ Valladolid Jordi Masip ដែលជាអតីតមិត្តរួមក្រុមរបស់ Messi នៅ Barcelona នេះឯង៕
ប្រភព៖ dailymail
Bong I.T