រាជធានីភ្នំពេញ ៖ យុវជនជាសិស្សសាលាម្នាក់របួសធ្ងន់ និងម្នាក់ទៀតរបួសស្រាល ខណៈពេលជិះម៉ូតូគេចពីគេដេញវាយទៅបុកជាប់ជាមួយកង់រថយន្ដកូរ៉ូ ឡាបណ្ដាលឱ្យរងរបួស ។ គ្រោះថ្នាក់នេះកើតឡើងកាលពីវេលាម៉ោង៣និង៣០នាទីរសៀលថ្ងៃទី៦ មេសា នៅមុខភោជនីយដ្ឋានផ្ទះម៉ែក្មេក ត្រង់ចំណុចផ្លូវលេខ៥៥កែងលេខ២៤០ ក្នុងសង្កាត់ចតុមុខ ខណ្ឌដូនពេញ ។
ប្រភពព័ត៌មានពីមន្ត្រីសមត្ថកិច្ចឱ្យដឹងថា ម៉ូតូសេ១១០ ស៊េរី២០១២ ពណ៌ខ្មៅ ជិះគ្នា២នាក់ ជាសិស្សសាលាបើកតាមផ្លូវលេខ២៤០ ពីកើតទៅលិច ឯរថយន្ដកូរ៉ូឡា ពណ៌ស្លែ បើកដោយស្ដ្រីម្នាក់តាមផ្លូវលេខ៥៥ ពីត្បូងទៅជើង ខណៈមកដល់កន្លែងកើតហេតុ ម៉ូតូនោះក៏ទៅបុកជាប់កង់រថយន្ដ ហើយអ្នកបើកផ្លោងទៅបោកនឹងកញ្ចក់បណ្ដាលឱ្យស្រាំ និងរងរបួសធ្ងន់ ចំណែកអ្នកជិះពីក្រោយរងរបួសស្រាល ។
ជនរងគ្រោះជិះម៉ូតូធុនសេ១១០ ស៊េរី២០១២ ឈ្មោះ ភា វីរៈយុទ្ធ ភេទប្រុស អាយុ២០ឆ្នាំ ជាសិស្សវិទ្យាល័យបាក់ទូក ស្នាក់នៅសង្កាត់កាកាប ខណ្ឌពោធិ៍សែនជ័យ ផ្លោងទៅបោកផ្ទប់កញ្ចក់រថយន្ដរបួសធ្ងន់ ឯមិត្ដភក្ដិជិះពីក្រោយរងរបួសស្រាល បានឱ្យដឹងថា បានជាពួកគេបើកម៉ូតូលឿន ដោយសារតែមានយុវជនមួយក្រុមទៀតជិះម៉ូតូដេញតាមវាយ ទើបពួកខ្លួនបើករត់គេចក៏ជួបគ្រោះថ្នាក់បែបនេះ ។
អ្នកបើកបររថយន្ដកូរ៉ូឡា ឈ្មោះគី សុខថាវី ភេទស្រី អាយុ៤៨ឆ្នាំ ជាគ្រូពេទ្យ ស្នាក់នៅផ្ទះសង់ថ្មី ក្នុងសង្កាត់កាកាប ខណ្ឌពោធិ៍សែនជ័យ។ ក្រោយពេលកើតហេតុ រថយន្ដក្រពឹតទ្វារមុខខាងឆ្វេងបិទអត់ជិត និងស្រាំកញ្ចក់ផ្ទាំងខាងមុខ ចំណែកម៉ូតូរយះក្បាំង រងការខូចខាតទាំងសងខាង ។
ជនរងគ្រោះត្រូវបានដឹកតាមរ៉ឺម៉កម៉ូតូយកទៅ ព្យាបាលនៅមន្ទីរពេទ្យមិត្ដភាពខ្មែរ-សូវៀត ចំណែករថយន្ដ និងម៉ូតូយកទៅជួសជុលរៀងខ្លួន ដោយភាគីទាំងពីរដោះស្រាយគ្នាដោយខ្លួនឯង៕
បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]