អីយ៉ា! បើលោក Laporta ជាប់ឆ្នោតធ្វើប្រធានក្លិប Barca ម្ដងទៀតលោកនឹងនាំយកអតីតកីឡាករម្នាក់នេះមកវិញ

អេស្ប៉ាញ៖ យោងតាមសេ​ចក្ដីរាយការណ៍បានឲ្យដឹងថា ក្លិបអ្នកមានបុណ្យ Barcelona នឹងទិញយកអតីតកីឡាកររបស់ខ្លួនម្នាក់ត្រឡប់មកវិញនោះគឺខ្សែការពារ Hector Ballerin បើសិនជាលោក Joan Laporta ឈ្នះការបោះឆ្នោតក្លាយជាប្រធានក្លិបសាជាថ្មី។

នៅឆ្នាំ២០១១ Hector Ballerin បានផ្ទេរទៅលេងឲ្យក្លិបកាំភ្លើងធំ Arsenal ក្នុងក្របខណ្ឌ Premier League ប៉ុន្តែកាលពីមុន រូបគេធ្លាប់លេងឲ្យថ្នាលបណ្ដុះបណ្ដាលយុវជនរបស់ Barcelona ដែលមានឈ្មោះថា La Masia ដល់ទៅ៨ឆ្នាំឯណោះ។

កីឡាករខ្សែការពារវ័យ២៥ឆ្នាំរូបនេះកំពុងជួបភាពលំបាកលំបិននៅ Arsenal ដោយសារទម្រង់លេងមិនសូវគាប់ភ្នែកលោកគ្រូបង្វឹក Mikel Arteta ទោះបីជាគេបានជាប់ជម្រើស១១នាក់ដំបូងញឹកញាប់ក៏ដោយ។ក្នុងនោះលោក Tony Adams ក៏ធ្លាប់រិះគន់ Ballerin ផងដែរ។

ក្លិប Arsenal អាចនឹងអនុញ្ញាតឲ្យ Ballerin ចាកចេញបើសិនក្លិបរកបានអ្នកមកជំនួសរូបគេហើយកីឡាករសញ្ជាតិអេស្ប៉ាញរូបនេះក៏ចង់ត្រឡប់មកលេងនៅទឹកដីកំណើតវិញដែរ។

លោក Joan Laporta ដែលធ្លាប់ធ្វើជាប្រធានក្លិបយក្សនៅតំបន់កាតាឡាន់ពីឆ្នាំ ២០០៣ ដល់ ២០១០ ម្ដងហើយនោះ ចង់យក Hector Ballerin មកវិញក្នុងតម្លៃ ២២លានផោន(ស្មើនឹងប្រមាណ ២៩.៧លានដុល្លារ) ខណៈដែលការបោះឆ្នោតជ្រើសរើសប្រធានក្លិបថ្មីនៅថ្ងៃទី២៤ខែមករាខាងមុខនេះហើយ។

Hector Ballerina បានបង្ហាញខ្លួនចំនួន ២១៩ប្រកួតឲ្យ Arsenal ហើយបើសិន Barcelona ចង់បានរូបគេមែនគឺប្រហែលត្រូវរង់ចាំរហូតដល់ផុតរដូវកាលនេះ៕

ប្រភព៖ thesun