មកស្វែងយល់ពីក្បួនជំនួញដ៏ជោគជ័យរបស់ជនជាតិចិន គឺក្បួនមាសទាំង១២ចំណុច

ចិន៖ បើនិយាយពីការរកស៊ី យើងអាចសំលឹងឃើញថា ជនជាតិចិន ពិតជាទទួលបានការទទួលស្គាល់ទាំងក្នុងពិភពលោកនិងក្នុងប្រទេសខ្មែរយើង ពេលណាដែលឃើញគ្រួសាររកស៊ីមានបានគេច្រើនតែហៅថា ចិនៗជាប់មាត់ (សំដៅលើអ្នករកស៊ី មិនថា ខ្មែរ ខ្មែរកាត់ចិន និងចិនឆៅ)។

ឥឡូវ ខ្មែរឡូត សូមណែនាំនូវអ្នកប្រាជ្ញជំនួញចិនដ៏ល្បីឈ្មោះមួយរូប គឺ ហ្វានលី (Fan Li) មិនត្រឹមតែជាទីប្រឹក្សារបស់ស្ដេចយៀក កូវជៀនដ៏ល្បីឈ្មោះមួយរូបនោះទេ លោកក៏ជាអ្នកប្រាជ្ញខាងជំនួញម្នាក់ផងដែរ លោកថែមទាំងមានភរិយាឈ្មោះស៊ីស៊ឺ (Xi Shi) ជាកំពូលសំរស់ទាំងបួនក្នុងប្រវត្តិសាស្ត្រចិនទៀតផង។ (សម័យផ្ការីកផ្ការោយ រឺ ឈុនឈៀវ)

ក្បួនមាសទាំង១២ មានដូចតទៅ៖

១. សមត្ថភាពស្ទង់មើលដឹងចរិតនិស្ស័យរបស់មនុស្ស។​ អ្នកត្រូវតែចេះអង្កេតចិរតលក្ខណៈមនុស្សតាមរយៈការឆ្លងកាត់ផ្ទាល់របស់អ្នក។

២. សមត្ថភាពអាចដឹកនាំគេបាន។  ពុំគួរវិនិច្ឆ័យអ្វីមួយទុកជាមុនលឿនរហ័សពេកនោះទេ។

៣. សមត្ថភាពនៅផ្តោតលើការរកស៊ីរបស់ខ្លួន។ កំណត់ឱ្យច្បាស់រវាងជីវិតផ្ទាល់ខ្លួន និងការរកស៊ី ចៀសវាងការច្របូកច្របល់ចូលគ្នា។

៤. សមត្ថភាពរៀបចំខ្លួនទុកជាមុន។ ការធ្វើអត្ថាធិប្បាយអ្វីមួយដែលពុំបានរៀបចំទុកមុន ពុំគួរធ្វើឡើយ។

៥. សមត្ថភាពអាចសម្របសម្រួលខ្លួនបាន។ សូមប្រាកដថាអ្នកត្រៀមខ្លួនជាស្រេចដើម្បីឆ្លើយតបអ្វីមួយទាន់ហេតុការណ៍។

៦. សមត្ថភាពគ្រប់គ្រងការជំពាក់បំណុល។ កុំអនុគ្រោះឱ្យមានការមិនសងបំណុល។ សូមប្រាកដថាអ្នកបានប្រមូលអ្វីដែលគេជំពាក់មកវិញ។

៧. សមត្ថភាពប្រើ និង លើកដាក់មនុស្ស។ ប្រើប្រាស់កូនឈ្នួលយ៉ាងម៉េចអោយពួកគេបានបញ្ចេញនូវសក្ដានុពល និងសមត្ថភាពឱ្យអស់ពីខ្លួន។

៨. សមត្ថភាពចេះវោហារសាសព្ទក្បោះក្បាយ ហើយក៏ចេះធ្វើទីផ្សារផងដែរ។ អ្នកត្រូវតែចេះពន្យល់អតិថិជនអំពីគុណសម្បត្តិនៃទំនិញរបស់អ្នក។

៩. សមត្ថភាពលេចធ្លោខាងបញ្ជាទិញឥវ៉ាន់។ ប្រើប្រាស់នូវការគិតគូរបស់អ្នកយ៉ាងម៉ត់ចត់ក្នុងការបញ្ជាទិញឥវ៉ាន់ចូលស្តុកដែលកំពុងតែខ្វះខាត។

១០. សមត្ថភាពវិភាគឱកាស និងហានិភ័យនៃទីផ្សារ។ ត្រូវដឹងថាអ្វីដែលអ្នកកំពុងតែលក់ ត្រូវទៅតាមភូមិសាស្ត្រ និង ទំនោរចិត្តរបស់មនុស្ស។

១១. សមត្ថភាពធ្វើជាគំរូគេ។ ត្រូវកំណត់ច្បាប់វិន័យឱ្យច្បាស់លាស់។ សូមប្រាកដថាច្បាប់វិន័យទាំងនោះត្រូវបានគេអនុវត្តតាម ដើម្បីបង្ហាញនូវទំនាក់ទំនងគ្នាល្អ។

១២. សមត្ថភាពអាចប្រមើលមើលឃើញនូវឱកាសរកស៊ីនៅពេលខាងមុខ។ យល់ដឹងនូវទំនោរ និង វដ្ដនៃទីផ្សារ។

ក្បួននិរភ័យមាសទាំង១២៖

១. កុំកំណាញ់ៈ កុំបញ្ចូល គុណសម្បត្តិ ឡូកឡំជាមួយភាពអមនុស្សធម៌​ឱ្យសោះ។

២. កុំស្ទាក់ស្ទើរៈ មានភាពជឿជាក់ក្នុងការស្វែងរកឱកាស រឺកាលានុវត្តភាព។ ពេលវេលាពិតជាមានសារៈសំខាន់។

៣. កុំហ៊ឺហារៈ កុំចាយហួសហេតុហួសប្រមាណដើម្បីសំញ៉ែងឫកគេឯង។

៤. កុំគ្មានសេចក្ដីស្មោះត្រង់ៈ សេចក្ដីទៀងត្រង់គឺជាបាតគ្រឹះតែមួយគត់នៃមុខជំនូញ។ បើគ្មានវា អ្នកនោះនឹងត្រូវរងនូវក្ដីអន្តរាយ។

៥. កុំយឺតយ៉ាវក្នុងការប្រមូលបំណុលៈ បើគ្មានការប្រមូលបំណុល ការបង្វិលសាច់ប្រាក់នឹងរងផលប៉ះពាល់។

៦. កុំបញ្ចុះតម្លៃតាមអំពើចិត្តៈ ការណ៍នេះនឹងគ្រាន់តែជាការប៉ះទង្គិចគ្នាឱ្យមានការប្រជែងតម្លៃ ក្នុងនោះដែរ ម្នាក់ៗមានតែការខាតបង់តែប៉ុណ្ណោះ។

៧. កុំផ្អើលតាមគេៈ បង្កើតកាលៈទេសៈឱ្យពិតប្រាកដ និងមិនមែនជាការផ្អើលមួយឆាវៗនោះឡើយ។

៨. កុំប្រឆាំងនឹងដំណើរវដ្តនៃការរកស៊ីៈ នៅពេលអ្វីៗចុះថ្លៃ អ្វីៗទាំងនោះក្រោយមកនឹងកើនតម្លៃឡើងវិញ ហើយនិងអាចខុសស្រឡះពីអ្វីខាងដើមទាំងពីរនេះ។

៩. កុំរស់ដូចកង្កែបក្នុងអណ្ដូងៈ សូមថែមអ្វីដែលថ្មីៗនិងធ្វើឱ្យរីកចំរើនឡើង។ អង្កេតសិក្សាអ្វីថ្មីៗឱ្យបានគត់មុត។

១០.កុំចាយហួសខ្ទង់ៈ ប្រាក់កាសមិនមែនជាអាជ្ញាបណ្ណដើម្បីតែចាយវាយពាសវាលពាសកាលនោះទេ។

១១. កុំទុកប្រាក់កាសតិចតួចពេក (សូមបំរុងដើមទុនឱ្យបានច្រើន)។ នៅពេលអាជីវកម្មមួយចុះថមថយល្បឿន អ្នកដែលមានប្រាក់កាសស្រាប់អាចពង្រីកអាជីវកម្មបាន ក្នុងគ្រាដែលអាជីវកម្មរបស់អ្នកដទៃទៀតបានបិទទ្វារ។

១២. កុំយល់ព្រមឱ្យផលិតផលគេលក់ដោយមិនបានមើលម៉ត់ចត់។ សូមប្រាកដថាអ្នកលក់របស់អ្នកនៅតែអនុវត្តទៅតាមទំរង់ការប្រតិបត្តិការស្ដង់ដារដដែល។

សូមស្វែងយល់បន្ថែម ក្នុងសៀវភៅ ពីរក្បាលដែលមាន ចំនងជើងថា The Twelve Golden Rules និង The Twelve Golden Safeguards ដែលមានលក់នៅសិង្ហបុរី ជាភាសាចិនកុកងឺ និងអង់គ្លេស។

យល់យ៉ាងណាដែរ? អ្នកទាំងអស់គ្នា! បើសិនជាមានគំនិតថ្មីបន្ថែមអាចដាក់វិចារណ៍ខាងក្រោមបាន។ ខាងលើជាអ្វីដែលយើងខ្ញុំបានដកស្រង់ចេញពីគំនិតរកស៊ីរបស់ជនជាតិចិនកាលពីបុរាណតែប៉ុណ្ណោះ៕