ជម្លោះផ្ទៃក្នុងកំពុងកើតមាននៅ Arsenal ដោយកីឡាករភាគច្រើនខឹងលោកគ្រូ Arteta រឿង...

អង់គ្លេស៖ កីឡាកររបស់ក្លិបកាំភ្លើងធំ Arsenal កំពុងខឹងទាក់ទងនឹងរឿងដែលលោកគ្រូបង្វឹកសញ្ជាតិអេស្ប៉ាញ Mikel Arteta ចូលចិត្តកីឡាករ Willian Bogers de Silva ហួសហេតុទាំងដែលខ្សែប្រយុទ្ធរូបនេះលេងមិនសូវបានល្អតាំងពីមកចូលរួមជាមួយក្រុមនៅរដូវក្ដៅមុនតែបែរជាបានចូលលេងញឹកញាប់ទៅវិញ។

ស្ថានភាពរបស់ក្លិប Arsenal ពេលនេះមិនសូវជារៀបរយប៉ុន្មានទេព្រោះលោកគ្រូបង្វឹក Arteta បន្តដឹកនាំឲ្យក្រុមចាញ់ការប្រកួតជារឿយៗថែមទាំងមានរឿងអាស្រូវពាក់ព័ន្ធនឹងកីឡាករដែលផ្ដល់ភាពរញ៉េរញ៉ៃមកដល់ក្លិបដូចជាករណី Granit Xhaka ដែលបានច្របាច់ក Ashley Westwood កាលពីប្រកួតគ្នាទល់នឹង Burnley។ បន្ទាប់មកក្លិបក៏ត្រូវទទួលរងសំពាធដោយបន្តប្រកួតស្មើគ្នាជាមួយ Southampton ក្នុងលទ្ធផល១ទល់នឹង១ នៅក្នុងទឹកដីកីឡដ្ឋាន Emirates ទៀត។

ខណៈនេះដែរលោកគ្រូបង្វឹក Arteta កំពុងព្យាយាមយ៉ាងខ្លាំងក្នុងការបង្វែងស្ថានភាពវឹកវររបស់ក្រុមប៉ុន្តែថ្មីៗនេះស្រាប់តែផ្ទុះព័ត៌មានរឿងជម្លោះផ្ទៃក្នុងនោះគឺកីឡាករនៅ Arsenal មិនសប្បាយចិត្តនឹងយុទ្ធសាស្ត្រខ្លះៗរបស់់លោកគ្រូ Arteta ។

យោងទៅតាមសារព័ត៌មាន The Athletic ឬសគល់នៃភាពមិនសប្បាយចិត្តរបស់កីឡាករគឺមកពីលោកគ្រូ Arteta ស្រឡាញ់កីឡាករមិនស្មើគ្នានោះឯង។

ពួកគេបានបង្ហើបដោយលើកឧទាហរណ៍ទៀតថា Willian de Silva ដែលត្រូវក្លិប Arsenal ចុះកុងត្រាយកកាលពីរដូវក្ដៅនេះមានឈ្មោះចូលលេងក្នុងការប្រកួតទល់នឹង Leeds កាលពីខែមុន ទាំងដែលមុនការប្រកួតពីរបីថ្ងៃ កីឡាករម្នាក់នេះបានទៅលេងទីក្រុង ឌូបៃ ដោយមិនជូនដំណឹងខាងក្លិបជាមុន។

កីឡាករក្នុងក្រុមមានអារម្មណ៍ថា បើសិនករណីនេះកើតឡើងលើកីឡាករដទៃដែលមិនមែនជា Willian ពួកគេប្រហែលត្រូវដាក់ទោសឬលោកគ្រូមិនដាក់ឈ្មោះឲ្យចូលប្រកួតជាដើម ហើយពួកគេគិតថាវាមិនយុត្តិធម៌ឡើយដែលលោកគ្រូធ្វើបែបនេះ។

ពួកគេក៏បានបង្ហើបទៀតថា ខ្សែការពារ David Luiz ដែលត្រូវលោកគ្រូ Arteta មិនដាក់ឈ្មោះឲ្យចូលប្រកួតកាលពីដើមរដូវដោយយកលេសថាចង់ការពារមិនឲ្យមានរបួសណាមួយកើតឡើងនោះ គឺការពិតរាងកាយរបសគេរឹងមាំធម្មតាទេ។

ទោះបីជាយ៉ាងណាក៏ដោយក៏លោកគ្រូបង្វឹក Arteta នៅតែទទួលបានការជឿទុកចិត្តពីថ្នាក់ដឹកនាំរបស់ Arsenal ដោយពួកគេគិតថាលោកគ្រូនឹងអាចធ្វើឲ្យស្ថានការណ៍ល្អប្រសើរឡើងវិញ។

មកទល់ពេលនេះ Arsenal កំពុងឈរនៅលេខរៀងទី១៥ក្នុងតារាង Premier League មាន១៤ពិន្ទុក្នុងដៃ ហើយការប្រកួតបន្ទាប់នេះគឺ ក្លិបត្រូវតទល់ជាមួយនឹង ក្លិបស្ករគ្រាប់ Everton នៅកីឡដ្ឋាន Goodison Park និង ត្រូវជួបក្រុមមេឃខៀវ Manchester City និង Chelsea ផងដែរ៕

ប្រភព៖ mirror