ប្រធានាធិបតីឥណ្ឌូណេស៊ី ស្នើ​ឱ្យមហាសេដ្ឋី Elon Musk ពិចារណាយកឥណ្ឌូណេស៊ី ធ្វើជាទីលានបាញ់បង្ហោះគ្រាប់រ៉ុក្កែត ​

ចាកាតា៖ តាមការចុះផ្សាយរបស់សារព័ត៌មាន CNA បានឱ្យដឹងថា ប្រធានាធិបតីឥណ្ឌូណេស៊ី លោក Joko Widodo បានស្នើអញ្ជើញមហាសេដ្ឋី Elon Musk នាយកប្រតិបត្តិក្រុមហ៊ុន SpaceX ឱ្យពិចារណាយក​កន្លែងបាញ់រ៉ុក្កែតស្ថិតនៅខេត្ត Papua ដែលឥណ្ឌូណេស៊ីបានគ្រោងទុក សម្រាប់ធ្វើជាទីលានបាញ់បង្ហោះរ៉ុក្កែតរបស់ SpaceX ។

បច្ចុប្បន្ន វិទ្យាស្ថានជាតិអាកាសចរណ៍និងអវកាសឥណ្ឌូណេស៊ី បាននឹងកំពុងសាងសង់កន្លែងបាញ់គ្រាប់រ៉ុក្កែតដំបូងបង្អស់របស់ខ្លួននៅកោះ Biak ក្នុងខេត្ត Papua ភាគខាងកើតប្រទេស។ ក្នុងនោះទីតាំងដែលនឹងត្រូវប្រើដើម្បីបាញ់បង្ហោះរ៉ុក្កែតអវកាសគ្មានមនុស្សបើកខ្នាតតូចនេះ ត្រូវបានគេរំពឹងថានឹងបញ្ចប់ការសាងសង់នៅឆ្នាំ ២០២៤ ខាងមុខ។

រម្លឹកថា កាលពីខែមុនលោក Joko Widodo ធ្លាប់បានបញ្ជូនសមាជិកខុទ្ទកាល័យជាន់ខ្ពស់ម្នាក់របស់លោក គឺលោក Luhut Binsar Pandjaitan រដ្ឋមន្រ្តីក្រសួងកិច្ចការសមុទ្រនិងវិនិយោគ ទៅសហរដ្ឋអាមេរិក ដើម្បីជួបប្រជុំសំណេះសំណាលជាមួយលោក Musk និងវិនិយោគិនអាមេរិកដទៃទៀត។ តែជាអកុសល ការប្រជុំក៏ត្រូវបានលុបចោលភ្លាមៗ បន្ទាប់ពីមហាសេដ្ឋីរូបនេះបានធ្វើតេស្តវិជ្ជមានកូវីដ ១៩។

គួរឱ្យដឹងដែរថា កាលពីថ្ងៃសុក្រ ទី១១ ធ្នូ សប្តាហ៍មុននេះ លោក Joko Widodo ក៏បានសន្ទនាតាមទូរស័ព្ទជាមួយលោក Musk ដើម្បីពិភាក្សាអំពីភាពជាដៃគូនាពេលខាងមុខ ជាមួយនឹងក្រុមហ៊ុនរថយន្តអគ្គិសនី Tesla របស់មហាសេដ្ឋីរូបនេះផងដែរ៕