ស្រួលធ្វើហ្នឹង ពងមាន់អាំង មានរសជាតិឈ្ងុយឆ្ងាញ់

កម្សាន្ត៖ យើងធ្លាប់តែឃើញគេលក់ ពងមាន់អាំង តាមរទេះម៉ូតូឬនៅតាមកន្លែងនានា ហើយវាមានរសជាតិឆ្ងាញ់ដែលធ្វើឲ្យយើងញុំាហើយចង់ញុំាទៀត។ ចំណែកឯរបៀបធ្វើវាក៏មិនពិបាកអីដែរ គឺយើងអាចធ្វើវាញុំានៅផ្ទះបាន។

គ្រឿងផ្សំ៖

១. ពងមាន់ ១១គ្រាប់

២. ស្ករស ១ស្លាបព្រាកន្លះ

៣. អំបិល ចុងស្លាបព្រាកាហ្វេ

៤. ទឹកស៊ីអីវ និងទឹកត្រី ១ស្លាបព្រាបាយ

៥. ទឹកប្រេងខ្យង ១ស្លាបព្រាកាហ្វេ

៦. ម្រេច កន្លះស្លាបព្រាកាហ្វេ

របៀបធ្វើ៖

១. យើងត្រូវចោះសំបកពងមាន់ដោយប្រើចុងស្លាបព្រា ចង្កិះ ឬចុងកាំបិតនូវផ្នែកខាងលើសំបកជារង្វង់ ហើយយកពងមាន់ទុកមួយឡែកសិន។ យកសំបកពងមាន់ទាំងនោះទៅលាងសម្អាតឲ្យស្អាតទុកដាក់ពងមាន់។

២. បន្ទាប់មកយើងត្រូវលាយគ្រឿងពងមាន់ដៅយដាក់ស្ករស អំបិល ទឹកស៊ីអីវ ទឹកត្រី ទឹកប្រេងខ្យង ម្រេចលាយចូលគ្នាឲ្យសព្វ ហើយយកវាទៅចម្រោះចៀសវាងមានកម្ទេចសំបកពងមាន់ឬកម្ទេចម្រេចក្នុងនឹង។

៣. យកពងមាន់ដែលលាយគ្រឿងហើយនោះចាក់ចូលក្នុងសំបកពងមាន់ចំនួន១០(កុំចាក់ពេញពេកព្រោះវាអាចនឹងហ៊ាពេលវាឡើង)។

៤. ដាំទឹកឲ្យពុះរួចយកពងមាន់ទៅចំហុយក្នុងឆ្នាំងដោយដាក់ចង្កិះ២លើមាត់ឆ្នាំងហើយដាក់គម្របពីលើ យើងបន្ថយភ្លើងឲ្យសល់ត្រឹមពាក់កណ្តាលទុកវារយៈពេល១០នាទី។ លុះគ្រប់១០នាទីយើងនឹងឃើញពងមាន់ឡើង នោះយើងត្រូវយកគម្របចេញ ហើយបន្ថែមភ្លើងឲ្យខ្លាំងទុករយៈពេល៣០នាទីបន្ថែមទៀតឬរហូតដល់វាឆ្អិនល្មម។ យើងអាចញុំាភ្លាមៗបានឬអាចយកទៅអាំងបន្ថែមក៏បាន៕

ប្រភព៖ Kitchen story