ជីវិត​គឺជា​ការ​តស៊ូ! យុវជន​​​​ពិការ​ដៃទាំង​​សង​ខាង​រូប​​នេះ តស៊ូ​​ជម្នះ​រហូត​បាន​ចូលរៀន​ថ្នាក់​​មហាវិទ្យាល័យ (មានវីដេអូ)

វៀតណាម៖ អាចចាត់ទុកបានថា ជារឿងមួយដ៏គួរឲ្យរំភើបចិត្តជាខ្លាំង ដែលយុវជនវ័យក្មេងជនជាតិវៀតណាមម្នាក់ ទីបំផុត​អាចបំពេញក្តីស្រមៃរបស់ខ្លួន បានចូលរៀននៅក្នុងថ្នាក់មហាវិទ្យាល័យ បើទោះបីជារូបគេជាមនុស្ស​ពិការដៃ​ទាំងសងខាងក្តី។

យុវជនខាងលើនេះ ត្រូវបានគេស្គាល់ឈ្មោះថា Ho Huu Hanh មានអាយុ ២០ឆ្នាំ រស់នៅក្នុងខេត្ត Dong Nai ប្រទេសវៀតណាម។ ថ្មីៗនេះ Hanh ត្រូវបានសាកលវិទ្យាល័យ Lac Hong University បានទទួលយករូបគេ​ឲ្យចូលរៀននៅក្នុងជំនាញ វិស្វកម្មបច្ចេកវិទ្យាព័ត៌មាន (Information Technology Engineering) ។

ជាការពិតណាស់ ពិការភាពដៃទាំងសងខាងរបស់ Hanh ពីកំណើតមកនេះ វាមិនមែនជារឿងងាយស្រួលនោះ​ឡើយ​សម្រាប់​រូបគេ ទាំងសកម្មភាពនៃការរស់នៅប្រចាំថ្ងៃ និងការសិក្សាជាដើម។ ប៉ុន្តែបើទោះបីជាយ៉ាងណាក្តី ជីវិតក្មេង​ប្រុស​ជំទង់ដ៏កំសត់រូបនេះ តែងតែព្យាយាមពុះពារជម្នះគ្រប់ឧបសគ្គជានិច្ច។

ងាកទៅអតីតកាលបន្តិច កាលនៅតូច Hanh ក៏ធ្លាប់មានគ្រោះថ្នាក់ដោយសារតែ ការរៀនជិះកង់ផងដែរ។ ប៉ុន្តែមិនថាយ៉ាងណា លុះដល់អាយុ ៥ឆ្នាំ Hanh ក៏អាចជិះវាបាន (កង់កែច្នៃ) និងថែមទាំងចេះហែលទឹកទៀតផង។ Hanh តែងតែបង្រៀនខ្លួនឯងជានិច្ច ទាំងការប្រើប្រាស់ជើង ដើម្បីចាប់កាន់ចង្កឹះញ៉ាំអាហារ រៀនបើកសន្លឹកទំព័រ​សៀវភៅ និងរៀនសរសេរជាដើម។

បន្ថែមលើនេះ Hanh ក៏អាចប្រើប្រាស់ជើងរបស់គេដើម្បីគូររូប និងប្រើជើងចុចវាយកំព្យូទ័រ រួមទាំងសកម្មភាពផ្សេងៗ​ជាច្រើនទៀតផងដែរ។

បើយោងតាមប្រភពសារព័ត៌មាន បានឲ្យដឹងថា អ្វីដែលរឹតតែគួរឲ្យចាប់អារម្មណ៍ជាងនេះទៅទៀតនោះ កាលនៅក្មេង Hanh ត្រូវបានគេស្គាល់ថា ជាសិស្សពូកែដោយទទួលបានចំណាត់ថ្នាក់ខ្ពស់ និងឈ្នះពានរង្វាន់សម្រាប់ការ​សរសេរយ៉ាងល្អថែមទៀតផង។

Hanh ទទួលបានការស្រលាញ់ ភាពកក់ក្តៅ និងការយកចិត្តទុកដាក់ជាច្រើន ពីសំណាក់គ្រូៗ និងមិត្តៗរួមថ្នាក់​របស់គេ រហូតថែមទាំងត្រូវបានពួកគេដាក់ឈ្មោះហៅក្រៅឲ្យគេថា «Penguin» (ឬ ភេនឃ្វីន) ដោយក្នុងន័យ លើកទឹកចិត្តឲ្យ Hanh តស៊ូជម្នះទៅមុខបន្តទៀតដោយខ្លួនឯង ដើម្បីបង្ហាញឲ្យអ្នកដទៃបានឃើញថា សូម្បីតែសត្វភេនឃ្វីន (Penguin) ក៏អាចហោះបានដែរ។

ក្តីសង្ឃឹមរបស់ Hanh ក្នុងថ្ងៃអនាគត គឺគេសង្ឃឹមថា ថ្ងៃណាមួយរូបគេនឹងអាចបានធ្វើការនៅក្នុងក្រុមហ៊ុន Google ។ ជាមួយនឹងការប្ដេជ្ញាចិត្ត និងការគាំទ្រ លើកទឹកចិត្ត ពីមនុស្សជាច្រើននោះ គ្រប់គ្នាក៏សង្ឃឹមយ៉ាងមុតមាំផងដែរថា Hanh អាចនឹងសម្រេចបានក្តីស្រមៃរបស់គេមួយនេះផងដែរ៕

តើសម្រាប់ប្រិយមិត្តវិញយល់យ៉ាងណាដែរ?