ក្ដៅកៅអីហើយ! អតីតគ្រូបង្វឹកនៅ PL រូបនេះជាគោលដៅធំ ដែលអាចនឹងមកដឹកនាំ R. Madrid ជំនួសលោក Zidane

បរទេស៖ បើយោងតាមគេហទំព័រ Marca បានឲ្យដឹងថាលោក Zinedine Zidane អាចនឹងបាត់បង់កៅអីជាគ្រូបង្វឹករបស់ក្លិបយក្សអេស៉្បាញ Real Madrid ប្រសិនបើនៅតែដឹកនាំមិនបានល្អចំនួនបួនប្រកួតទៀត ពោលត្រូវប៉ះជាមួយ Sevilla, Borussia Monchengladbach, Atletico Madrid  និង Athletic Bilbao ។

គួរឲ្យដឹងដែរថា Real Madrid ហាក់ដូចជាមានទម្រង់លេងដុនដាបខ្លាំងនៅដើមរដូវកាល២០២០/២១នេះ​ ពោលកំពុងឈរនៅលេខ៣ក្នុងពូល B នៃពានរង្វាន់ UEFA Champions League និងឈរនៅលេខ៤ ក្នុងក្របខ័ណ្ឌ La Liga ។ ហើយសម្រាប់ពីរប្រកួតចុងក្រោយនេះ គឺចាញ់ទាំងពីរប្រកួតតែម្តង ដោយចាញ់ Alaves ក្នុងដី​ ២-១ និងចាញ់ Shakhtar Donetsk ក្រៅដី ២-០។

ដោយឡែកគេហទំព័រ Marca បានបន្ថែមទៀតថាអតីតគ្រូបង្វឹករបស់ក្លិបមាន់ខ្នាយមាស Tottenham Hotspur លោក Mauricio Pochettino គឺជាបេក្ខភាពឈានមុខគេដែលអាចមកដឹកនាំ Real Madrid ជំនួសលោក Zidane ។​ មែនទែនទៅនៅពេលនេះលោក Pochettino មិនទាន់សម្រេចចិត្តទៅដឹកនាំក្លិបណាមួយនៅឡើយទេ ក្រោយចាកចេញពី Spurs កាលពីចុងឆ្នាំ២០១៩មក៕

ប្រភព៖ thesun