ស្ត្រីជាម្ដាយរូបនេះ មុខមាត់ក្មេងខ្លាំងពេក ដល់ថ្នាក់គេច្រឡំថាជាសង្សាររបស់កូនប្រុសវ័យ២៤ឆ្នាំ (មានវីដេអូ)

ឥណ្ឌូណេស៊ី៖ ស្ដ្រីជនជាតិឥណ្ឌូណេស៊ីម្នាក់ កំពុងតែទទួលបានការចាប់អារម្មណ៍យ៉ាងខ្លាំងនៅលើបណ្ដាញសង្គមអុីនស្ដារក្រាម (IG) បន្ទាប់ពីនាងបានបង្ហោះរូបថតរបស់នាងជាមួយស្វាមី ដែលមើលទៅហាក់ដូចជាកូនស្រីជាជាងប្រពន្ធទៅទៀត។

នាង Puspa Dewi គឺជា Influencer ម្នាក់​រស់នៅទីក្រុងហ្សាការតា ប្រទេសឥណ្ឌូណេស៊ី ដែលគេទទួលស្គាល់ថានាងមានសម្រស់ក្មេងជាងវ័យ ព្រោះបច្ចុប្បន្ននេះ នាងមានអាយុ៥៣​ឆ្នាំហើយ ប៉ុន្ដែមើលទៅហាក់ដូចជាយុវតីអាយុប្រហែល២០ឆ្នាំអីចឹង។ នាង Puspa មានកូនប្រុសចំនួនពីរនាក់ តាំងពីនាងមានអាយុខ្ទង់២០ឆ្នាំមកម្ល៉េះ ហើយបើគិតមកទល់សព្វថ្ងៃ ចំណងអាពាហ៍ពិពាហ៍របស់នាងជាមួយស្វាមីអាយុ៥៦ឆ្នាំ មានរយៈពេល២៦ឆ្នាំហើយ និងទទួលបានចៅប្រុសដ៏គួរឲ្យស្រលាញ់ម្នាក់ផងដែរ។

ថ្មីៗនេះ អ្នកម្ដាយមុខក្មេង Puspa បានបង្ហោះរូបថតជាមួយប្ដីរបស់ចំនួនពីរសន្លឹក ដែលរូបទីមួយថត​កាលពី២៧ឆ្នាំមុន នៅពេលអ្នកទាំងពីរទើបណាត់ជួបគ្នាលើកដំបូង ហើយរូបទីពីរនៅពេលក្លាយខ្លួនជាយាយនិងតា។ ទន្ទឹមនឹងនេះដែរ រាល់ពេលដែលនាងបង្ហោះរូបជាមួយកូនប្រុសអាយុ២៤ឆ្នាំម្ដងៗ គេគ្រប់គ្នាតែងតែច្រឡំថាជាសង្សារនឹងគ្នាទៅវិញ។

យ៉ាងណាមិញ យោងតាមសារព័ត៌មាន China Press បានទម្លាយថា នាង Puspa មានសម្រស់ក្មេងជាងវ័យបែបនេះ គឺដោយសារ​ការបរិភោគអាហារដែលល្អសម្រាប់សុខភាព រស់នៅប្រកបដោយភាពរីករាយសប្បាយចិត្ដ និងហាត់ប្រាណយ៉ាងទៀងទាត់។ ហើយនាងស្រលាញ់វិស័យកីឡានេះ តាំងតែពីនៅរៀនមកម្ល៉េះ និងមានទម្លាប់ហាត់ប្រាណអស់រយៈពេលជាច្រើនឆ្នាំមកហើយ៕

សូមទស្សនារូបភាព និងវីដេអូខាងក្រោម៖