ទុក្ខជាន់ទុក្ខ! ជំងឺគ្រុនផ្តាសាយបក្សី បានផ្ទុះរាលដាលសាជាថ្មីនៅកសិដ្ឋានក្នុងសង្កាត់់ទី៤ របស់ជប៉ុន ខណៈប្រទេសនេះកំពុងរងការរាតត្បាត ដោយជំងឺកូវីដ១៩

ជប៉ុន៖ ក្រសួងកសិកម្មជប៉ុនបានប្រាប់ឱ្យដឹងកាលពីថ្ងៃអង្គារ៍ ទី១ ខែធ្នូ​ ថា ជំងឺគ្រុនផ្តាសាយបក្សីត្រូវបានគេរកឃើញនៅក្នុងសង្កាត់ទី៤ របស់ជប៉ុន ដោយសារតែរលកថ្មីនៃជំងឺនេះ បានផ្ទុះឡើងខ្លាំងនៅឯកសិដ្ឋានចិញ្ចឹមសត្វ ដែលវាមិនបានរីករាយដាលអស់រយៈពេលជាងបួនឆ្នាំមកហើយ។

ក្រសួងក៏បានបន្ថែមដែរថា គ្រុនផ្តាសាយបក្សីនេះត្រូវបានគេរកឃើញនៅកសិដ្ឋានចិញ្ចឹមសត្វមួយកន្លែងនៅសង្កាត់មីយ៉ាហ្សាគី (Miyazaki) លើកោះ Kyushu ស្ថិតនៅភាគនិរតីនៃប្រទេសជប៉ុន ដែលមាន់ចំនួន ៤ម៉ឺនក្បាលនឹងត្រូវគេយកទៅសម្លាប់ និងកម្ទេចចោល។ ប៉ុន្តែទន្ទឹមនឹងនោះដែរ ក្រសួងក៏បានបញ្ជាក់ថា គ្រុនផ្តាសាយបក្សីមិនអាចឆ្លងមកមនុស្សបានតាមរយៈការបរិភោគសាច់ ឬស៊ុតវានោះទេ។

គួរបញ្ជាក់ឱ្យដឹង​ដែរថា ការផ្ទុះជំងឺគ្រុនផ្តាសាយបក្សីចុងក្រោយបង្អស់របស់ប្រទេសជប៉ុន គឺនៅឆ្នាំ ២០១៨ ដែលមាន់ចំនួន ៩១,០០០ ក្បាលត្រូវបានសម្លាប់ ក្នុងនោះដែរមាន់សរុបចំនួន ១.៦៧ លានក្បាល ត្រូវបានសម្លាប់នៅចន្លោះខែ វិច្ឆិកា ឆ្នាំ ២០១៦ និងខែ មីនា ឆ្នាំ ២០១៧៕