ដោយសារកូវីដ ១៩ កំពុងផ្ទុះឡើងសាជាថ្មី ទើបធ្វើឱ្យ អាន គុណកូឡា ជួបបញ្ហាបែបនេះ

ភ្នំពេញ៖ តារាចម្រៀងសម្លេងផ្អែមប្រចាំផលិតកម្ម M លោក អាន គុណកូឡា នាមួយរយៈចុងក្រោយនេះហាក់ស្ងប់ស្ងាត់ពីការងារសិល្បៈជាខ្លាំង ខណៈពុំសូវមានបទចម្រៀងចេញលក់ច្រើននៅលើទីផ្សារដូចកាលពីនៅផលិតកម្មសាន់ដេនោះទេ។

ទាញអារម្មណ៍មកមើលជីវិតគ្រួសារវិញ កាលពីជាងមួយខែមុនម្ចាស់បទ “លាមុនស្អប់” រូបនេះទើបនឹងបានប្រកាសជាសាធារណៈថា នឹងបញ្ចប់នូវជីវិតនៅលីវ ហើយចាប់ដៃគ្នាជាមួយអនាគតភរិយានាពាក់កណ្តាលខែធ្នូនេះហើយ។

ដោយឡែកស្រាប់តែកាលពីម្សិលមិញនេះ អ្នកគាំទក៏បានឃើញតារាចម្រៀងប្រចាំផលិតកម្ម M លោក អាន គុណកូឡា បែរជាប្រកាសនូវការរំសាយពិធីមង្គលការទៅវិញដែលមានខ្លឹមសាររួមថា “ដោយសារតែបញ្ហាជំងឺកូវីដ ១៩ កំពុងតែផ្ទុះឡើងសារជាថ្មី យើងខ្ញុំសូមចូលរួមក្នុងការទប់ស្កាត់ផងដែរ ក្នុងនាមខ្ញុំជាកូនកម្លោះ អាន គុណកូឡា និងអាណាព្យាបាលកូនប្រុសស្រីទាំងសងខាង សុំប្រកាសផ្អាកកម្មវិធីរៀបមង្គលការជាបណ្តោះអាសន្នសិន ដែលត្រូវនឹងថ្ងៃសៅរ៍ ទី១២ ខែធ្នូ ឆ្នាំ២០២០ នេះ សម្រាប់ព័ត៌មានលម្អិតនឹងធ្វើការជូនដំណឹងសារជាថ្មីម្តងទៀតនៅពេលក្រោយ ដូច្នេះសូមគោរពជម្រាបជូន ឯកឧត្តម លោកជំទាវ និងភ្ញៀវកិត្តិយសទាំងអស់មេត្តាយោគយល់ និងសូមអធ្យាស្រ័យដល់ក្រុមគ្រួសារយើងខ្ញុំផង”។

គួររំលឹកផងដែរថា ដោយសារប្រទេសកម្ពុជាកំពុងតែពើបប្រទះនូវបញ្ហានៃការផ្ទុះឡើងវិញសាជាថ្មីនៃជំងឺកូវីដ ១៩ ទើបរាជរដ្ឋាភិបាលសម្រេចផ្អាកមិនឱ្យមានការរៀបចំពិធីមង្គលការ ឬ ការជួបជុំដែលមានសមាជិកលើសពី ២០នាក់ ដូច្នេះហើយសូម្បីតែសិល្បករក៏ត្រូវតែគោរពតាមសេចក្តីប្រកាសនេះផងដែរ៕

សូមទស្សនារូបភាពខាងក្រោមនេះ៖