ថៃ៖ នាយកដ្ឋានដែនសមុទ្រនិងធនធានឆ្នេរនៃប្រទេសថៃ (DMCR) បានធ្វើការព្រមានប្រជាជនរបស់ខ្លួន មិនឲ្យបរិភោគមឹករង្វង់ខៀវ (blue-ring octopus) ព្រោះពិសរបស់វាអាចបណ្ដាលឲ្យអ្នកបរិភោគស្លាប់បាន ហើយមឹកប្រភេទនេះ ត្រូវបានគេដាក់លក់នៅលើទីផ្សារ ក្នុងខេត្ដ Pathum Thani។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមនាយកដ្ឋាន DMCR បានសរសេរនៅលើទំព័រហ្វេសប៊ុកផ្លូវការរបស់ខ្លួនថា វិទ្យាស្ថានស្រាវជ្រាវ និង អភិវឌ្ឍន៍ធនធានសមុទ្រនិងឆ្នេរ បានទទួលរបាយការណ៍ពីពលរដ្ឋម្នាក់ឈ្មោះ Jantra Phumphuang ដែលបានប្រទះឃើញមឹករង្វង់ខៀវ ដាក់លក់នៅលើទីផ្សារ។
ទន្ទឹមនឹងនេះ នាយកដ្ឋានក៏បានបង្ហោះរូបភាពមឹកដែលគេអាំងលក់ ដើម្បីដាស់តឿនប្រជាជនឲ្យពិនិត្យមើលជាមុន ថាតើមឹកនោះមានវង្វង់ខៀវតូចៗលើខ្លួន ឬអត់ មុនពេលទិញយកទៅបរិភោគ។ ក្នុងនោះដែរ នាយកដ្ឋានបានបញ្ជាក់ថា ពិសរបស់មឹកប្រភេទនេះមានគ្រោះថ្នាក់ណាស់ ព្រោះវាអាចទ្រាំទ្រនឹងកម្ដៅលើស២០០អង្សាសេឯណោះ ដូច្នេះការចម្អិននឹងមិនអាចកម្ចាត់ជាតិពិសរបស់វាបានទេ។
គួរបញ្ជាក់ថា មឹករង្វង់ខៀវត្រូវបានគេទទួលស្គាល់ថាជាសត្វសមុទ្រមួយប្រភេទ ក្នុងចំណោមសត្វសមុទ្រដែលមានជាពិសខ្លាំងបំផុតនៅលើពិភពលោក។ វាមានទំហំចន្លោះចាប់ពី ១២ ទៅ ២០សង់ទីម៉ែត្រ ហើយអាចរស់បានប្រហែល២ឆ្នាំ ប៉ុន្ដែអាយុកាលរបស់វាក៏អាចប្រែប្រួលទៅតាមចំណី សីតុណ្ហភាព និងអាំងតង់ស៊ីតេនៃពន្លឺនៅក្នុងជម្រករបស់ពួកវាផងដែរ៕
សូមទស្សនារូបភាពខាងក្រោម៖
ប្រភព៖ The Nation | Wikipedia