ដំរី ខាវ៉ាន់ ត្រូវគេដឹងជាទូទៅថា ជាដំរីឈ្មោលដ៏ឯកោបំផុតនៅលើលោក។ ក្រោយពីបានមកដល់កម្ពុជា នៅរសៀលថ្ងៃ ៣០ វិច្ឆិកា តាមព្រលានយន្តហោះអន្តរជាតិ ខេត្តសៀមរាប គេរំពឹងថា ពេលនេះ ខាវ៉ាន់ នឹងលែងជាដំរីដែលឯកោទៀតហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខាវ៉ាន់ បានមកដល់កន្លែងរស់នៅ នៅយប់ថ្ងៃដដែលនេះ ដើម្បីផ្សាំនឹងបរិស្ថានជុំវិញសិន ក្នុងខេត្តឧត្តរមានជ័យ ដោយមានដំរីញី ០៣ក្បាល មានឈ្មោះ Dipoh, Arun Reah និង Sarai Mia រស់នៅជាមួយ។
បើតាមក្រសួងបរិស្ថាន ដំរីឈ្មោលដែលមានអាយុ ៣៦ឆ្នាំនេះ ត្រូវបានក្រុមអភិរក្សសត្វព្រៃជួយសង្គ្រោះពីសួនសត្វមួយនៃប្រទេសប៉ាគីស្ថាន តាមរយៈការតស៊ូផ្នែកច្បាប់ ហើយចុងក្រោយតុលាកំពូលរបស់ប៉ាគីស្ថានបានសម្រេចឱ្យដំរីឈ្មោះខាវ៉ាន់ត្រូវមានសេរីភាព និងបញ្ជូនមករស់នៅក្នុងប្រទេសកម្ពុជាដែលគេត្រៀមជាស្រេចនូវដំរីញីបីក្បាលចាំធ្វើជាគ្នីគ្នា។
លោក នេត្រ ភក្ត្រា រដ្ឋលេខាក្រសួងបរិស្ថានបានបញ្ជាក់ថា ក្រោយពីទទួលបានការប្រោះព្រំពីព្រះសង្ឃនៅអាកាសយានដ្ឋានអន្តរជាតិសៀមរាបនៅល្ងាចថ្ងៃ ៣០ វិច្ឆកា ដំរីខាវ៉ាន់ត្រូវបាននាំយកទៅកាន់ជម្រកថ្មី ដែលមានទំហំដីជាងបួនពាន់ហិកតានៅក្នុងដែនជម្រកសត្វព្រៃគូលែនព្រហ្មទេព ក្នុងភូមិសាស្ត្រខេត្តឧត្តរមានជ័យ។ នៅក្នុងតំបន់នោះ មានសត្វដំរីស្រុកញីចំនួន ៣ក្បាលដែលបានយកមកពីខេត្តមណ្ឌលគិរី ហើយដំរីញីទាំងបីនឹងក្លាយជាគូស្នេហាថ្មីរបស់ខាវ៉ាន់ ដើម្បីធ្វើការបង្កាត់ពូជក្នុងគោលបំណងបង្កើតប្រសិទ្ធភាពក្នុងការបន្តពូជសត្វដំរីអាស៊ីឱ្យសម្បូរឡើងវិញ។
ផ្ទះថ្មីរបស់ដំរីខាវ៉ាន់នៅក្នុងប្រទេសកម្ពុជា គឺស្ថិតនៅក្នុងដែនជម្រកសត្វព្រៃមួយក្នុងចំណោមតំបន់ការពារធម្មជាតិ និងរបៀងអភិរក្សជីវៈចម្រុះទាំង ៦៨កន្លែងរបស់កម្ពុជា។
ដំរីខាវ៉ាន់គឺជាប្រភេទដំរីអាស៊ីតែមួយគត់ ដែលមាននៅប្រទេសប៉ាគីសស្ថាន បន្ទាប់ពីគូស្នេហ៍បានស្លាប់ចោលកាលពី ៨ឆ្នាំមុន។ កម្ពុជាមានប្រភេទដំរីអាស៊ីនេះចន្លោះពី ៤០០ ទៅ ៦០០ក្បាល ដែលកំពុងរស់នៅក្នុងព្រៃនៃតំបន់ការពារធម្មជាតិក្នុងខេត្តរតនគិរី និងមណ្ឌលគិរី និងនៅក្នុងតំបន់ជួរភ្នំក្រវ៉ាញ។ បច្ចុប្បន្ន កម្ពុជាមានដំរីស្រុកជាង ៧០ក្បាល ។
បើតាមការបញ្ជាក់ ដំរីខាវ៉ាន់ត្រូវបានក្រុមឃ្លាំមើលសត្វព្រៃតវ៉ាទៅនឹងការថែទាំមិនត្រឹមត្រូវរបស់ក្នុងសួនសត្វប្រទេសប៉ាគីសស្ថាន រួមទាំងការបង្ខាំង និងការដាក់ច្រវ៉ាក់នៅស្ថានភាពអាក្រក់ជាដើម៕