តេហេរ៉ង់៖ យោងតាមរបាយការណ៍បានឱ្យដឹងថា មេបញ្ជាការជាន់ខ្ពស់នៃកងឆ្មាំបដិវត្តអ៊ីស្លាមអ៊ីរ៉ង់ ហៅកាត់ (IRGC) ត្រូវបានសម្លាប់នៅក្នុងការវាយប្រហារ ដោយយន្តហោះគ្មានមនុស្សបើក នៅជិតព្រំដែនស៊ីរី-អ៊ីរ៉ាក់ កាលពីយប់ថ្ងៃអាទិត្យកន្លងទៅនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សមេបញ្ជាការ IRGC និងអ្នកអមការពារចំនួន ៣នាក់ ត្រូវបានបាញ់ប្រហារដោយយន្តហោះគ្មានមនុស្សបើក បន្ទាប់ពីក្បួនរថយន្តរបស់លោក បានធ្វើដំណើរចូលទៅប្រទេសស៊ីរីតាមរយៈច្រកព្រំដែន Al Qaim ពីប្រទេសអ៊ីរ៉ាក់ ហើយសាកសពអ្នកទាំងនោះ ត្រូវបានបញ្ជូនទៅទុកនៅរដ្ឋធានីបាកដាដរបស់ប្រទេសអ៊ីរ៉ាក់។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយជាច្រើន ដែលដកស្រង់សំដីមន្ត្រីអ៊ីរ៉ាក់។ ប៉ុន្តែរហូតមកដល់ពេលនេះ អ៊ីរ៉ង់មិនទាន់បានបញ្ជាក់ ឬបដិសេធសេចក្តីរាយការណ៍ណាមួយឡើយ។
គួរជម្រាបថា ករណីវាយប្រហារមន្ត្រីជាន់ខ្ពស់អ៊ីរ៉ង់នេះ បានកើតឡើងបន្ទាប់ពីអ្នកវិទ្យាសាស្ត្រនុយក្លេអ៊ែរកំពូលរបស់អ៊ីរ៉ង់មួយរូប គឺលោក Mohsen Fakhrizadeh ត្រូវបានគេលបធ្វើឃាតនៅទីក្រុង Absard ក្នុងតំបន់ Damavand ក្បែររដ្ឋធានីតេហេរ៉ង់ កាលពីថ្ងៃសុក្រសប្តាហ៍មុន ដោយមន្ត្រីអ៊ីរ៉ង់បានចោទអ៊ីស្រាអែល ថាជាអ្នកនៅពីក្រោយករណីឃាតកម្មនេះ៕