ប្រទេសចំនួន៤ ពួតដៃជាមួយមហាអំណាច ធ្វើសមយុទ្ធយោធារួមគ្នានៅភាគខាងកើតសមុទ្រមេឌីទែរ៉ាណេ បន្ទាប់ពីតួកគីលេងមួយក្បាច់នេះ

ក្រិក៖ យោងតាមការរាយការណ៍របស់សារព័ត៌មាន Ahval បានឱ្យដឹងកាលពីថ្ងៃអាទិត្យថា កងទ័ពជើងទឹកនៃប្រទេសក្រិក សាធារណរដ្ឋស៊ីប  អារ៉ាប់រួម អេស៊ីប និងមហាអំណាចបារាំង បានចាប់ផ្តើមធ្វើសមយុទ្ធយោធារួមគ្នា ដែលមានឈ្មោះថា “Medusa” នៅភាគខាងកើតសមុទ្រមេឌីទែរ៉ាណេកាលពីថ្ងៃច័ន្ទ បន្ទាប់ពីមានភាពតានតឹងជាមួយប្រទេសតួកគីមកាន់តែខ្លាំងឡើងៗ ដោយតួកគីបានរំលោភលើដែនសមុទ្រ និងមានបំណងយកធនធានអ៊ីដ្រូកាបូនរបស់បណ្តាប្រទេសទាំងនោះដោយខុសច្បាប់។

ឆ្លើយតបទៅនឹងការពួតដៃរួមគ្នាប្រឈមមុខនឹងតួកគី ក្រសួងការពារជាតិតួកគីបែរជាមានប្រតិកម្មទៅវិញ ដោយចាត់ទុកការធ្វើសមយុទ្ធយោធានេះ ជាកត្តាជំរុញឱ្យមានភាពតានតឹងក្នុងតំបន់ និងចង់បង្កសង្រ្គាមទៅវិញ។

ភាពតានតឹងផ្នែកនយោបាយ និងយោធារវាងប្រទេសតួកគី និងប្រទេសដទៃទៀតនៅក្នុងតំបន់បានកើនឡើង បន្ទាប់ពីប្រទេសតួកគីបានបញ្ជូននាវាប្រតិបត្តិការអង្កេត ដើម្បីទៅរុករកអ៊ីដ្រូកាបូននៅភាគខាងកើតសមុទ្រមេឌីទែរ៉ាណេនារដូវក្តៅនេះ ដែលសកម្មភាពនេះបានរំលោភអធិបតេយ្យសមុទ្រដែនដីរបស់ប្រទេសក្រិក និងសាធារណរដ្ឋស៊ីបយ៉ាងធ្ងន់ធ្ងរ។ ទន្ទឹមនឹងនេះ ប្រទេសតួកគីក៏មានភាពចម្រូងចម្រាសទៅលើបញ្ហានយោបាយរបស់ខ្លួនជាមួយអេស៊ីប និងអារ៉ាប់រួមជុំវិញសង្គ្រាមនៅលីប៊ីផងដែរ។

គួរបញ្ជាក់ផងដែរថា ថ្នាក់ដឹកនាំនយោបាយរបស់សហភាពអ៊ឺរ៉ុបនឹងជួបគ្នានៅខែក្រោយនេះ ដើម្បីសំរេចទៅលើការដាក់ទណ្ឌកម្មប្រឆាំងនឹងតួកគីចំពោះការធ្វើឱ្យអន្តរាយដល់អធិបតេយ្យភាពប្រទេសក្រិក និងស៊ីប ដោយក្នុងនោះ បារាំងបានប្រកាន់ជំហរបស់ខ្លួនក្នុងការគាំទ្រប្រទេសក្រិក ដើម្បីស្វែងរកការដាក់ទណ្ឌកម្មទៅលើសមាជិកណាតូមួយនេះ៕