ដើម្បីចៀសវាងការឆ្លងជំងឺកូវីដ១៩ ទាំងក្នុងសហគមន៍ ខេត្តសៀមរាប និងក្រុងភ្នំពេញ ក្រសួងអប់រំ យុវជន និងកីឡា បានដាក់ចេញវិធានការដូចជា៖
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. ផ្អាករាល់សកម្មភាពជួបជុំ សិក្ខាសាលា កិច្ចប្រជុំ ដែលមានអ្នកចូលរួមលើសពី ២០នាក់ក្នុងរយៈពេល ១៥ថ្ងៃ ចាប់ពីពេលផ្សាយដំណឹងនេះតទៅ
២. ផ្អាកការរៀនសូត្ររបស់សិស្សថ្នាក់ទី ១២ និងការបំប៉នត្រៀមប្រឡង ដែលធ្វើឡើងក្នុងគ្រឹះស្ថានសិក្សា ឬលក្ខណៈប្រមូលផ្តុំ។ សិស្សថ្នាក់ទី ១២ ត្រូវបន្តធ្វើស្វ័យសិក្សា និងរៀនតាមអនឡាញ។ ការប្រឡងបាក់ឌុប សម័យប្រឡង៖ ២១ ធ្នូ ២០២០ នៅរក្សាកាលបរិច្ឆេទដដែល។
៣. ផ្អាកដំណើរការគ្រឹះស្ថានឧត្តមសិក្សាសាធារណៈ និងឯកជន ជាបណ្តោះអាសន្ន រយៈពេល ១៥ថ្ងៃ
៤. ផ្អាករាល់ការហាត់ប្រាណ និងលេងកីឡា ដែលមានលក្ខណៈប្រមូលផ្តុំ រយៈពេល ១៥ថ្ងៃ។
ជាការកត់សម្គាល់ មុនមានការប្រកាសពីក្រសួងអប់រំ សម្តេចនាយករដ្ឋមន្ត្រី ហ៊ុន សែន នៅថ្ងៃ ៣០វិច្ឆិកានេះ បានបញ្ចេញសារជាសំឡេងតាមតេលេក្រាម ដោយប្រាប់ឲ្យមន្ត្រីពាក់ព័ន្ធផ្សាយដំណឹងលើវិធានការផ្អាករាល់ការជួបជុំដែលមានមនុស្សច្រើន រាប់ទាំងអាពាហ៍ពិពាហ៍ផង រយៈពេល ១៥ថ្ងៃជាបណ្តោះអាសន្ន ទាំងនៅភ្នំពេញ និងសៀមរាប។
នាយករដ្ឋមន្ត្រី៖ «ហាមការជួបជុំតែម្តង! ចាប់ពីថ្ងៃទី ១ ដល់ ១៥ ឬ ១៦ធ្នូ ហាមមិនឲ្យមានការជួបជុំ ទោះការជួបជុំណាក៏ដោយ រាប់ទាំងអាពាហ៍ពិពាហ៍ដែរ ទាំងនៅភ្នំពេញ និងខេត្តសៀមរាប។»
សម្តេចបន្តថា៖ «សូមអនុវត្តបន្ទាន់ចាប់ពីពេលទទួលបទបញ្ជានេះទៅ។ មនុស្សលើសពី ២០នាក់ គឺមិនត្រូវមានការជួបជុំទេ។ តែបើ ២០នាក់ចុះក្រោម គឺត្រូវមានគម្លាតឲ្យឆ្ងាយពីគ្នា។ យើងមិនហាមឃាត់រឿងចេញក្រៅផ្ទះទេ តែសូមកុំឲ្យមានការកកស្ទះ ហើយសូមកាត់បន្ថយការចេញក្រៅផ្ទះ។ បើមិនធ្វើថ្ងៃនេះទេ គឺយើងនឹងយឺតពេល»។
សូមបញ្ជាក់ថា ក្រសួងសុខាភិបាល បានប្រកាសពីលទ្ធផលតេស្តវិជ្ជមាន ៨ករណីបន្ថែមទៀតពីព្រឹត្តិការណ៍សហគមន៍ ២៨វិច្ឆិកា ដែលធ្វើឲ្យចំនួនសរុបឡើងដល់ ១៤នាក់ រីឯលទ្ធផល ២២៣៤នាក់អវិជ្ជមាន។
គិតមកទល់ថ្ងៃ ៣០វិច្ឆិកានេះ កម្ពុជាមានករណីកូវីដ ១៩ ចំនួន ៣២៣នាក់ និងសះស្បើយ ៣០១នាក់៕