តក់ស្លុត! សមាជិកសភាអាមេរិក កំពុងតែជួបប្រជុំជាមួយលោក ដូណាល់ ត្រាំ សុខៗ បែរជាទទួលសារតេស្តវិជ្ជមាន​កូវីដ១៩

វ៉ានស៊ីនតោន៖  សមាជិកព្រឹទ្ធសភាសាធារណរដ្ឋនៃរដ្ឋ Pennsylvania លោក Doug Mastriano ភ្លាមៗបានចាកចេញពីកិច្ចប្រជុំជាមួយ លោក ដូណាល់ ត្រាំ បន្ទាប់ពីទទួលបាន​សារថា  គាត់បានធ្វើតេស្តវិជ្ជមានសម្រាប់ជំងឺកូវីដ១៩។

កាលពីថ្ងៃទី ២៥ ខែវិច្ឆិកា  លោក Doug Mastriano​ អាយុ​ ៥៦ឆ្នាំ ត្រូវជាសមាជិកព្រឹទ្ធសភានៃរដ្ឋ Pennsylvania បានចូលរួមកិច្ចប្រជុំនៅសេតវិមានជាមួយប្រធានាធិបតី ដូណាល់ ត្រាំ ដើម្បីពិភាក្សាអំពីកិច្ចខំប្រឹងប្រែងក្នុងការលុបចោលលទ្ធផលនៃការបោះឆ្នោត។ អំឡុងពេលធ្វើកិច្ចប្រជុំ លោក Doug Mastriano បានទទួលរបាយការណ៍ថា លោកបានធ្វើតេស្តវិជ្ជមានលើជំងឺកូវីដ១៩ ហើយបានបញ្ចូនទៅបុគ្គលិកពេទ្យនៅសេតវិមាន។

លើសពីនេះទៅទៀត សេតវិមានមិនទាន់បានធ្វើការអត្ថាធិប្បាយនៅឡើយទេ ចំពោះឧប្បត្តិហេតុនេះ និងមិនទាន់ឆ្លើយតបនឹងសំណួរថា តើនរណាខ្លះគួរតែត្រូវបានដាក់ឱ្យនៅដាច់ដោយឡែក បន្ទាប់ពីបានជួបជាមួយសមាជិកព្រឹទ្ធសភាលោក Doug Mastriano រួច។

គួរជម្រាបផងដែរថា រដ្ឋ​ Pennsylvania​ និងរដ្ឋដទៃទៀត កំពុងតែជួបប្រទះនូវការកើនឡើងនៃអត្រាអ្នកឆ្លងជំងឺកូវីដ១៩ ជារៀងរាល់ថ្ងៃ។ មន្រ្តីរដ្ឋ Pennsylvania បានកត់ត្រាជាមធ្យមនៃករណីឆ្លងថ្មីៗនេះជិត ៧,០០០ ករណីក្នុងមួយថ្ងៃៗ ៕