ចិន៖ ប្រទេសចិន បានប្តេជ្ញាប្រកាន់ខ្ជាប់នូវភាពច្នៃប្រឌិតរបស់ខ្លួន និងផ្តល់ការគាំទ្របន្ថែមទៀត ក្នុងការអភិវឌ្ឍវិស័យបច្ចេកវិទ្យាដោយខ្លួនឯងក្នុងរយៈពេល ៥ ឆ្នាំខាងមុខនេះ។ នេះបើយោងតាមសេចក្តីថ្លែងការណ៍មួយ ដែលបានចេញផ្សាយនៅក្នុងសម័យប្រជុំពេញអង្គលើកទី ៥ នៃគណៈកម្មាធិការមជ្ឈិមបក្សកុម្មុយនីស្តចិនលើកទី១៩ កាលពីថ្ងៃព្រហស្បតិ៍។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការអភិវឌ្ឍន៍យុទ្ធសាស្រ្តបច្ចេកវិទ្យាថ្មីរបស់ប្រទេសនេះ នឹងត្រូវបានគេដាក់ឱ្យដំណើរការនៅតាមតំបន់បង្គោលព្រំដែន ក៏ដូចជាតំបន់ដែលមានតម្រូវការ និងផលប្រយោជន៍ខ្ពស់ដល់មនុស្សជាតិ។
គួរបញ្ជាក់ផងដែរថា សេចក្តីថ្លែងការណ៍នេះត្រូវបានធ្វើឡើង បន្ទាប់ពីកិច្ចប្រជុំជាន់ខ្ពស់របស់គណបក្សចិនទៅលើខ្លឹមសារនៃផែនការ ៥ឆ្នាំ លើកទី១៤ របស់ខ្លួនសម្រាប់ឆ្នាំ ២០២១-២០២៥ ខាងមុខ ដែលវាជាផែនការមួយក្នុងចំណោមគោលនយោបាយសំខាន់ៗ ដែលកំណត់គោលដៅរយៈពេលមធ្យម សម្រាប់ការអភិវឌ្ឍសេដ្ឋកិច្ច និងសង្គម។
ប្រធានាធិបតីចិន លោក ស៊ី ជីងពីង ក្នុងនាមជាអគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិន ក៏បានធ្វើសុន្ទរកថាដ៏សំខាន់មួយនៅក្នុងសម័យប្រជុំនេះ ដោយលោកបានលើកឡើងពីសារៈសំខាន់នៃការពន្លឿននវានុវត្តន៍វិទ្យាសាស្ត្រ និងបច្ចេកវិទ្យាជាអាទិ៍ ដើម្បីជំរុញការអភិវឌ្ឍជាតិឱ្យកាន់តែប្រសើរឡើង និងត្រៀមខ្លួនជាមហាអំណាចដ៏ធំជាងគេក្នុងវិស័យវិទ្យាសាស្ត និងបច្ចេកវិទ្យាក្នុងឆាកអន្តរជាតិនាពេលខាងមុខ៕