មិនគួរឱ្យជឿ! ដោយសារមូលហេតុមួយនេះ ធ្វើឱ្យចំនួនអ្នកធ្វើអត្តឃាតនៅជប៉ុនគិតត្រឹមតែរយៈពេលមួយខែ កើនលើសចំនួនអ្នកស្លាប់ដោយជំងឺកូវីដ១៩ ទៅទៀត

ជប៉ុន៖ យោងតាមសារព័ត៌មាន New York Post បានឱ្យដឹងថា  ចំនួនមនុស្សដែលបានស្លាប់ដោយសារការធ្វើអត្តឃាតគិតត្រឹមរយៈពេលមួយខែ មានច្រើនលើសពីចំនួនអ្នកស្លាប់ដោយសារជំងឺកូវីដ១៩ ទៅទៀត ដោយសារតែពួកគេកំពុងប្រឈមនឹងវិបត្តិសុខភាពផ្លូវចិត្ត ខណៈដែលជំងឺអាសន្នរោគមួយនេះកំពុងតែរីករាលដាល។

ទីភ្នាក់ងារប៉ូលិសជាតិជប៉ុនបាននិយាយថា ការធ្វើអត្តឃាតបានកើនឡើងដល់ចំនួន ២,១៥៣នាក់ គិតត្រឹមតែក្នុងខែតុលាមួយប៉ុណ្ណោះ ដែលធ្វើឱ្យមនុស្សសរុបជាង ១៧,០០០នាក់ ស្លាប់នៅក្នុងរយៈពេលមួយឆ្នាំ។ បើប្រៀបទៅនឹងអ្នកស្លាប់ដោយសារជំងឺកូវីដ១៩ មានតិចជាង ២,០០០នាក់ ប៉ុណ្ណោះក្នុងឆ្នាំ ២០២០ នេះ។

ក្រុមអ្នកជំនាញបានគូសបញ្ជាក់ថា ជំងឺរាតត្បាតកូវីដ១៩ បានធ្វើឱ្យបញ្ហាសុខភាពផ្លូវចិត្តរបស់ប្រជាជនជប៉ុនកាន់តែមានសភាពធ្ងន់ធ្ងរ ដោយសារតែកត្តាជាប់គាំងរយៈពេលយូរ ការដាក់ដោយឡែកពីសមាជិកគ្រួសារ ភាពអត់ការងារធ្វើ បញ្ហាហិរញ្ញវត្ថុផ្សេងៗ និងការបិទសាលារៀនជាដើម។

ឆ្លើយតបនឹងស្ថានការណ៍នេះ អ្នកនាំពាក្យរបស់រដ្ឋាភិបាលបានប្រកាសពីចំណាត់ការរបស់ខ្លួន ដើម្បីជួយប្រជាជនដែលជួបវិបត្តិ តាមរយៈការផ្តល់សេវាប្រឹក្សាតាមទូរស័ព្ទឥតគិតថ្លៃ ឬតាមបណ្តាញសង្គមនានា។ ទន្ទឹមនឹងនេះដែរ អាជ្ញាធរជប៉ុន ក៏បានត្រៀមបង្កើនមូលនិធិបង្ការការធ្វើអត្តឃាត ដោយបានអនុម័តថវិកាចំនួន ១០ លានដុល្លារបន្ថែមទៅលើកញ្ចប់ថវិកាចាស់ ២៤ លានដុល្លាររបស់ខ្លួន៕