មូលហេតុនេះហើយ ដែលធ្វើឱ្យបាក់ស្ពាននៅកោះតៃវ៉ាន់ សម្លាប់មនុស្សអស់ ៦នាក់

តៃប៉ិ៖ យោងតាមរបាយការណ៍ស៊ើបអង្កេត បានចេញផ្សាយឱ្យដឹងថា កំហុសរចនាស្ពាន, ការគ្រប់គ្រងមិនបានល្អ និងការថែទាំមិនបានគ្រប់គ្រាន់ គឺជាមូលហេតុ​ដែលបណ្តាលឱ្យមាន​ការបាក់ស្ពានដែកមួយនៅភាគឦសានកោះតៃវ៉ាន់ ​និងបានសម្លាប់មនុស្ស ៦នាក់ កាលពីឆ្នាំ ២០១៩។

ក្រុមប្រឹក្សាសុវត្ថិភាពដឹកជញ្ជូនតៃវ៉ាន់បាននិយាយនៅក្នុងរបាយការណ៍ថា ការបាក់រលំស្ពាន​ Nanfangao នៅឯសង្កាត់នេសាទមួយ ក្នុងតំបន់ ​Yilan គឺភាគច្រើនបណ្តាលមកពី ​ច្រេះនៃខ្សែដែក រួមជាមួយនឹងការថែទាំមិនគ្រប់គ្រាន់ និងការគ្រប់គ្រងមិនត្រឹមត្រូវ។

ហេតុការណ៍ បាក់ស្ពានបានកើតឡើងនៅម៉ោងប្រហែល ៩:៣០ នាទីព្រឹកថ្ងៃទី ១ ខែតុលា ឆ្នាំ ២០១៩ ដែលបានសម្លាប់នាវិកបរទេសចំនួន ៦នាក់ ក្នុងនោះមានជនជាតិហ្វិលីពីន ៣ នាក់ និងឥណ្ឌូនេស៊ី ៣ នាក់។

គួរបញ្ជាក់ផងដែរថា ការកសាងស្ពាន​ Nanfangao ឡើងវិញ ​នឹងត្រូវចាប់ផ្តើម​នៅខែតុលា ឆ្នាំ២០២១ខាងមុខ ហើយគ្រោងនឹងបញ្ចប់នៅខែសីហាឆ្នាំ ២០២២ ៕