អ្នកវិទ្យាសាស្ត្រនុយក្លេអ៊ែរកំពូល​អ៊ីរ៉ង់​ ត្រូវ​គេលួចធ្វើឃាត​​នៅក្បែររដ្ឋធានីតេហេរ៉ង់

តេហេរ៉ង់៖ ក្រសួងការពារជាតិ​អ៊ីរ៉ង់បានបញ្ជាក់ឱ្យដឹងថា អ្នកវិទ្យាសាស្ត្រនុយក្លេអ៊ែរជាន់ខ្ពស់បំផុតរបស់អ៊ីរ៉ង់ គឺលោក Mohsen Fakhrizadeh ត្រូវបានគេលួចធ្វើឃាតនៅ​ក្បែររដ្ឋធានីតេហេរ៉ង់ ក្នុងប្រទេសអ៊ីរ៉ង់។

លោក Fakhrizadeh ត្រូវ​គេលួចវាយប្រហារ​នៅទីក្រុង Absard ក្នុង​តំបន់ Damavand ហើយបានស្លាប់បាត់បង់ជីវិត ពេលបញ្ជូនទៅដល់មន្ទីរពេទ្យមួយ។

អ៊ីរ៉ង់ធ្លាប់ទទូចថា កម្មវិធីនុយក្លេអ៊ែររបស់ខ្លួន គឺធ្វើឡើងក្នុងគោលបំណងសន្តិភាពតែប៉ុណ្ណោះ។ ប៉ុន្តែព័ត៌មានស្តីពីការធ្វើឃាតអ្នកវិទ្យាសាស្ត្រនុយក្លេអ៊ែរជាន់នេះ បានកើតមានឡើងខណៈ​មានការព្រួយបារម្ភថ្មី អំពី​កំណើនឡើងនៃ​ផលិតបរិមាណអ៊ុយរ៉ាញ៉ូម ដែលជាសមាសធាតុសំខាន់ប្រើសម្រាប់​ផលិតទៅជាអាវុធនុយក្លេអ៊ែរ។

គួរជម្រាបថា នៅចន្លោះឆ្នាំ២០១០ និងឆ្នាំ២០១២ មានអ្នកវិទ្យាសាស្ត្រនុយក្លេអ៊ែរអ៊ីរ៉ង់ចំនួន ៤នាក់ ត្រូវបានគេលួចធ្វើឃាត។ ហើយអ៊ីរ៉ង់ក៏ធ្លាប់បានចោទប្រកាន់អ៊ីស្រាអែល ថា​បានជាប់ពាក់ព័ន្ធលើការស្លាប់របស់អ្នកវិទ្យាសាស្ត្រទាំងនោះ៕