បរទេស៖ យោងទៅតាមការរាយការណ៍របស់សារពត៌មាន អាល់ហ្សាសេរ៉ា បានឱ្យដឹងថា ប្រទេសអេមីរ៉ាតអារ៉ាប់រួម បានបញ្ឈប់ការចេញទិដ្ឋាការថ្មីដល់ពលរដ្ឋនៃប្រទេសចំនួន ១៣ ដែលភាគច្រើនជារដ្ឋមូស្លីមរួមមាន ប្រទេសអ៊ីរ៉ាក់ អ៊ីរ៉ង់ តួកគី ស៊ីរី សូម៉ាលី អាហ្វកានីស្ថាន លីប៊ី លីបង់ យេមែន អាល់ហ្សេរី កេនយ៉ា ប៉ាគីស្ថាន និងទុយនីស៊ីជាដើម ដែលឯកសារអន្តោប្រវេសន៍ស្តីពីការផ្អាកពាក្យសុំទិដ្ឋាការនេះ បានចូលជាធរមានកាលពីថ្ងៃទី ១៨ ខែវិច្ឆិកា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកាលពីសប្តាហ៍មុន ក្រសួងការបរទេសរបស់ប៉ាគីស្ថានបាននិយាយថា ប្រទេសអារ៉ាប់រួមបានបញ្ឈប់ដំណើរការទិដ្ឋាការថ្មីជាបណ្តោះអាសន្នសម្រាប់ពលរដ្ឋរបស់ខ្លួន និងប្រទេសមួយចំនួនផ្សេងទៀត។ រដ្ឋធានីអ៊ីស្លាម៉ាបាដ បាននិយាយថា ខ្លួនកំពុងស្វែងរកព័ត៌មានពីប្រទេសអារ៉ាប់រួមទាក់ទងនឹងមូលហេតុនៃការផ្អាកនេះ ប៉ុន្តែគេគិតថាវាអាចនឹងមានការទាក់ទងទៅនឹងកត្តាសន្តិសុខ និងកត្តាឆ្លងរាលដាលនៃវីរុសកូរ៉ូណា។
គួរបញ្ជាក់ថា អ្នកដែលកាន់ទិដ្ឋាការមានសុពលភាព គឺមិនត្រូវបានប៉ះពាល់ដោយការរឹតត្បិតថ្មីនេះទេ ហើយក៏អាចធ្វើដំណើរចេញចូលក្នុងប្រទេសអារ៉ាប់រួមជាធម្មតា។ ចំណែកពាក្យសុំទិដ្ឋាការការងារថ្មី និងទិដ្ឋាការទេសចរណ៍នេះនឹងត្រូវបានផ្អាករហូតដល់មានការជូនដំណឹងជាថ្មី៕