កាសស្តាប់ត្រចៀកឥតខ្សែ ល្អបំផុតប្រចាំឆ្នាំ2020 ដែលអ្នកគួរទិញ

បរទេស៖ មិនថាពាក់ដើម្បីស្តាប់ចម្រៀងនៅពេលធម្មតាៗក្នុងជិវិតប្រចាំថ្ងៃ ឬស្តាប់ពេលហាត់ប្រាណនោះទេ ឬដើម្បីនិយាយគ្នាតាមទូរសព្ទ អ្នកគួរតែមានកាសស្តាប់ដ៏ល្អមួយ។ ខាងក្រោមជាជម្រើសកាសឥតខ្សែចំនួន6ល្អបំផុតប្រចាំឆ្នាំ2020 ដែលអ្នកគួរទិញ៖

1.    SAMSUNG GALAXY BUDS PLUS

Samsung Galaxy Buds Plus គឺជាជម្រើសល្អបំផុតសម្រាប់អ្នកដែលរកកាសឥតខ្សែដែលមានតម្លៃសមរម្យ។ ជាមួយនឹងថាមពលថ្មបន្តរហូតដល់ទៅ ១១ ម៉ោង ហើយវាភ្ជាប់មកជាមួយឆ្នាំងសាកឥតខ្សែដើម្បីសាកថ្ម។ គុណភាពសំឡេងរបស់វាត្រូវបានកែលម្អច្រើនគួរឱ្យកត់សម្គាល់ជាងកាសស៊េរីមុនៗរបស់ពួកវា។

2.    APPLE AIRPODS PRO

បើនិយាយពីផលិតផលរបស់ Apple គ្មានអ្នកណាវ៉ាដាច់ AIRPODS PRO នោះទេ។ វាមានមុខងារលុបសំលេងរំខាននៅខាងក្រៅជុំវិញអ្នក ពេលដែលអ្នកចង់ស្តាប់តែសំឡេងនៅក្នុងកាស។ ជាមួយនឹងថ្មកាន់រហូតដល់ 4.5 ម៉ោង វាមានសំឡេងបន្លឺមកមានគុណភាពខ្ពស់លីច្បាស់ សាកសមនឹងអ្នកដែលតែងតែនិយាយគ្នាតាមកាសស្តាប់ត្រចៀក។

3.    JABRA ELITE 75T

កាសស្តាប់ត្រចៀករបស់ Jabra គីជាប្រភេទកាសដែលកម្រមានក្នុងចំណោមកាសស្តាប់ឥតខ្សែ ដោយវាអាចឱ្យអ្នក ភ្ជាប់វាជាមួយឧបករណ៍ពីរក្នុងពេលតែមួយ។ បើសិនជាផលិតផលផ្សេងគីតម្រូវឱ្យអ្នកប្តូរពីឧបករណ៍ភ្ជាប់មួយទៅឧបករណ៍មួយទៀត ប៉ុន្តែជាមួយ JABRA អ្នកអាចស្តាប់បទភ្លេងនៅលើកុំព្យូទ័រយួរដៃរបស់អ្នក ហើយក៏អាចភ្ជាប់ទៅទូរសព្ទដៃអ្នកបាននៅពេលតែមួយ។​ កាសនេះមានសំឡេងលីខ្លាំង បូកជាមួយបាសបុកបន្ថែមទៀត សាកសមនឹងអ្នកចូលចិត្តស្តាប់តន្ត្រីដែលមានភ្លេងបុក។

4.    BEATS POWERBEATS PRO

កាស Powerbeats Pro សាកសមសម្រាប់អ្នកចូលចិត្តហាត់ប្រាណ ឬរត់បំផុត។ ទំពក់ភ្ជាប់ត្រចៀករបស់កាសនេះនៅជាប់នឹងត្រចៀករបស់អ្នកមិនរបូត បើទោះបីអ្នកធ្វើចលនាខ្លាំងក៏ដោយ។ កាសនេះមានថ្មកាន់ដល់ទៅ 9​ ម៉ោង បើទោះជាអ្នករត់ម៉ារ៉ាតុងក៏វាមិនទាន់រលត់ដែរ។ ឯសំឡេងវិញគីមានគុណភាពល្អខ្លាំងណាស់ សាកសមជំរុញទឹកចិត្តអ្នក ពេលហាត់ប្រាណ។

5.    SENNHEISER MOMENTUM TRUE WIRELESS 2

ប្រសិនបើអ្នកយល់ថាខ្លួនអ្នកជាអ្នកចូលចិត្តស្តាប់សំឡេង អ្នកគួរជ្រើសរើសកាស SENNHEISER MOMENTUM TRUE WIRELESS 2។ សំឡេងរបស់វាលឺពិរោះច្បាស់ ព្រមទាំងមានមុខងារកាត់បន្ថយសំឡេង ដើម្បីអ្នកបានផ្តោតលើតន្ត្រីក្នុងកាសបានច្បាស់ បើទោះជាវាចាញ់កាសផ្សេងៗត្រង់ថាមពលថ្ម និងមានតម្លៃ $300 គីថ្លៃជាងកាសដទៃនៅក្នុងតារាងរបស់យើងក៏ដោយ។

6.    SONY WF-XB700

Sony តែងតែល្បីឈ្មោះខាងសំឡេងល្អ វាពិតជាត្រឹមត្រូវមែន កាសប្រភេទនេះលក់ក្នុងតម្លៃក្រោម 100​$ តែអ្នកនៅតែអាចយកបានកាសដែលបុកខ្លាំង ហើយជាប់នឹងត្រចៀកបានល្អទោះបីគ្មានទំពក់ពាក់នឹងត្រចៀកក៏ដោយ។​ កាសនេះមានថ្មកាន់រហូតដល់ 9 ម៉ោង ព្រមទាំងមានកំរិត IPX4 ដែលធន់នឹងទឹក និងញើសផងដែរ។