ករណីគ្រោះថ្នាក់ចរាចរណ៍ដ៏រន្ធត់មួយនៅប្រេស៊ីល បានផ្តាច់ជីវិតមនុស្សអស់ ៤១នាក់

បរទេស៖ អាជ្ញាធរប្រេស៊ីលបានឱ្យដឹងថា ហេតុការណ៍គ្រោះថ្នាក់ចរាចរណ៍ដ៏រន្ធត់ ដែលកើតឡើងរវាងឡានក្រុងនិងឡានដឹកទំនិញកាលពីថ្ងៃពុធ នៅតំបន់​ភាគអាគ្នេយ៍ប្រទេសប្រេស៊ីល បានឆក់យកជីវិតមនុស្សយ៉ាងហោចណាស់ ៤១នាក់។

​សេចក្តីថ្លែងការណ៍​ក្រុមប៉ូលិសបាន​គូសបញ្ជាក់ថា មនុស្សចំនួន ៣៧នាក់ បានស្លាប់ភ្លាមៗនៅនឹងកន្លែងកើតហេតុ និង ៤នាក់ទៀត បានស្លាប់​​ពេលបញ្ជូនទៅដល់មន្ទីរពេទ្យ។ ទន្ទឹមនឹងនេះ ចំនួនអ្នកស្លាប់ ត្រូវបានគេរំពឹងថា អាចនឹងកើនឡើងបន្ថែមទៀត។

​ប្រព័ន្ធផ្សព្វផ្សាយ​ប្រេស៊ីលក៏បានរាយការណ៍ដែរថា នៅក្នុងឡានក្រុងគឺមាន​អ្នកដំណើរសរុបចំនួន ៥៣នាក់ ដែលជាបុគ្គលិករបស់ក្រុមហ៊ុនវាយនភ័ណ្ឌមួយ។ ហើយ​បន្ទាប់ពីហេតុការណ៍កើតឡើងភ្លាមៗ ក្រុមអ្នកជួយសង្គ្រោះ​ត្រូវបានបញ្ជូនទៅដល់កន្លែងកើតហេតុ ដើម្បីជួយអ្នករងរបួស​ ដែលជាប់នៅក្នុងបំណែក​យានយន្ត។

​គួរជម្រាបថា បច្ចុប្បន្ន​ក្រុមប៉ូលិស​បាននឹងកំពុងបើកការស៊ើបអង្កេត ដើម្បីរកឱ្យឃើញពីមូលហេតុ ដែលបង្កជាគ្រោះថ្នាក់ចរាចរណ៍នេះឡើង៕