ប៉ូឡូញ៖ អាងហែលទឹកជ្រៅជាងគេបំផុតនៅលើពិភពលោកឈ្មោះថា DeepSpot បានបើកដំណើរការ កាលពីថ្ងៃសៅរ៍ ទី២១ ខែវិច្ឆិកាកន្លងទៅនេះ ដែលមានទីតាំងស្ថិតនៅក្នុងទីក្រុង Mszczonow ចម្ងាយប្រមាណ ៤០គីឡូម៉ែត្រពីរដ្ឋធានី Warsaw នៃប្រទេសប៉ូឡូញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអាងហែលទឹក DeepSpot មានជម្រៅ ៤៥ម៉ែត្រ និងអាចផ្ទុកបរិមាណទឹកបានរហូតដល់ទៅ ៨,០០០គូបឯណោះ។ វារួមបញ្ចូលទាំងកប៉ាល់បាក់បែក សម្រាប់ឲ្យអ្នកមុជទឹកអាចធ្វើការរុករកដោយសេរីផងដែរ។ លើសពីនេះ នៅខាងក្រោមផ្ទៃទឹករួមមានបន្ទប់សណ្ឋាគារ ភោជនីយដ្ឋាន និងបន្ទប់សន្និសីទជាដើម ដូច្នេះភ្ញៀវអាចចូលទស្សនាក្នុងអាងទឹក តាមរយៈរូងកញ្ចក់ផ្ទាល់តែម្ដង។
បច្ចុប្បន្ន អាងហែលទឹកនេះអាចទទួលអតិថិជនបានកំឡុងពេលមានជំងឺរាតត្បាត ដោយសារតែវាត្រូវបានគេចាត់ទុកថាមជ្ឈមណ្ឌលបណ្ដុះបណ្ដាលសម្រាប់អ្នកទើបចាប់ផ្ដើមជ្រមុជទឹកដំបូង ក៏ដូចជាអ្នកដែលមានបទពិសោធន៍ជាដើម។ ជាក់ស្ដែងអតិថិជនចំនួន១២នាក់ ក៏បានមកចូលរួមថ្ងៃបើកដំបូងផងដែរ។
តែទោះជាយ៉ាងណា អាងហែលទឹកគួរឲ្យចាប់អារម្មណ៍នេះ នឹងអាចរក្សាឯតទគ្គកម្មជាអាងទឹកជ្រៅបំផុតរបស់ពិភពលោក ក្នុងរយៈពេលតែ៦ខែប៉ុណ្ណោះ ពោលគឺរហូតដល់អាងហែលទឹក Blue Abyss ជម្រៅ ៥០ម៉ែត្រ ក្នុងទីក្រុង Colchester នៃចក្រភពអង់គ្លេសសាងសង់រួចរាល់៕
សូមទស្សនារូបភាព និងវីដេអូខាងក្រោម៖