ករណីបំផ្ទុះគ្រាប់បែកចំនួនពីរគ្រាប់ បណ្តាលឱ្យមនុស្សស្លាប់និងរបួសជិត ៦០នាក់

កាប៊ុល៖ មន្ត្រីខេត្ត Bamiyan បាននិយាយកាលពីថ្ងៃអង្គារថា ករណីបំផ្ទុះគ្រាប់បែកនៅខេត្ត Bamiyan ភាគកណ្តាលប្រទេសអាហ្វហ្គានីស្ថាន បានសម្លាប់មនុស្សយ៉ាងហោចណាស់ ១៤នាក់ និង ៤៥នាក់​រងរបួស ខណៈសហគមន៍អន្តរជាតិបានសន្យាផ្តល់ជំនួយ​ដល់​អាហ្វហ្គានីស្ថាន​ក្នុងសន្និសីទមួយនៅប្រទេសស្វីស។

លោក Zabardast Safai ស្នងការនគរបាលខេត្តបាន​គូសបញ្ជាក់ថា គ្រាប់បែកទាំង ២គ្រាប់ ដែលត្រូវ​បានគេ​បង្កប់នៅក្បែរថ្នល់មួយ​ នៅទីប្រជុំជនសំខាន់​ក្នុងទីក្រុងនៃខេត្ត Bamiyan បានសម្លាប់ជនស៊ីវិល ១២នាក់ និងប៉ូលិសចរាចរណ៍ ២នាក់។ ចំណែកមនុស្ស ៤៥នាក់ផ្សេងទៀត ដែលស្ថិតនៅភោជនីយដ្ឋាននិងហាង​ក្បែរនោះ បានរងរបួសធ្ងន់ស្រាល។

ប្រទេសរាប់សិបបាន​សន្យាផ្តល់ជំនួយរាប់ពាន់លានដុល្លារ សម្រាប់ប្រទេសអាហ្វហ្គានីស្ថាននៅក្នុងសន្និសីទនៅទីក្រុងហ្សឺណែវកាលពីថ្ងៃអង្គារ ដោយសង្ឃឹមថា​កិច្ចចរចាសន្តិភាព ដែលបានចាប់ផ្តើមថ្មីៗនេះ រវាងរដ្ឋាភិបាលនិងក្រុមតាលីបង់ អាចនឹងបញ្ចប់សង្គ្រាមកើតឡើងជិតពីរទសវត្ស។

គួរជម្រាបថា ជនស៊ីវិលអាហ្វហ្គានីស្ថាន ជិត ៦,០០០នាក់ ត្រូវបានសម្លាប់ឬរងរបួសក្នុងរយៈពេល ៩ ខែដំបូងនៃឆ្នាំ​នេះ ខណៈដែលការប្រយុទ្ធគ្នាដ៏ខ្លាំងក្លារវាងកម្លាំងរដ្ឋាភិបាលនិងក្រុមបះបោរតាលីបង់ចេះតែបន្តកើតមានឡើង បើទោះបីមានកិច្ចខិតខំ​ប្រឹងប្រឹងស្វែងរកសន្តិភាពយ៉ាងណាក៏ដោយ៕