នៅក៏មិនសូវបានលេងដដែល! Chelsea អនុញ្ញាតឲ្យខ្សែប្រយុទ្ធជួរមុខរូបនេះចាកចេញនៅខែមករាខាងមុខនេះហើយ

អង់គ្លេស៖ បើតាមសេចក្ដីរាយការណ៍របស់សារព័ត៌មាន The Athletic បានឲ្យដឹងថាក្លិបតោខៀវ Chelsea នឹងអនុញ្ញាតឲ្យខ្សែប្រយុទ្ធវ័យ៣៤ឆ្នាំ Olivier Giroud ចាកចេញពីទឹកដី Stamford Bridge នៅទីផ្សារដោះដូរខែមករាខាងមុខនេះ ប្រសិនបើមានក្លិបផ្សេងចង់បានរូបគេទៅរួមក្រុម។ 

គួរបញ្ជាក់ដែរថាតារាជើងស៊ុតជម្រើសជាតិបារាំងរូបនេះនឹងអស់កុងត្រាជាមួយ Chelsea នៅចុងរដូវកាល២០២០/២១នេះ។ ក្នុងនោះក្លិប Inter Milan របស់អ៊ីតាលីជាបេក្ខភាពឈានមុខគេក្នុងការនាំយកកីឡាកររូបនេះទៅរួមក្រុមនៅខែមករាខាងមុខ។ 

រម្លឹកបន្តិចទៅ Giroud ផ្លាស់ចេញពី Arsenal មករួមជាមួយ Chelsea កាលពីឆ្នាំ២០១៨ ដោយបង្ហាញខ្លួនឲ្យក្លិបតោខៀវមួយនេះបានសរុប៩៥ប្រកួត ស៊ុតបាន២៩គ្រាប់ និងបោះបាល់ឲ្យដៃគូបញ្ជប់ទីបាន១៤លើកផងដែរ៕

ប្រភព៖ sportsmole