ដំរីឯកោរបស់ប៉ាគីស្ថាន ធ្វើពិធីលាគ្នាលើកចុងក្រោយ មុន​​ហោះមកកម្ពុជាក្នុងសប្ដាហ៍នេះ

ប៉ាគីស្ថាន៖ កាលពីថ្ងៃចន្ទ ទី២៣ ខែវិច្ឆិកា ក្រុមមន្ដ្រីនិងប្រជាជនប៉ាគីស្ថាន បានប្រមូលផ្ដុំគ្នានៅក្នុងសួនសត្វ Islamabad ដើម្បីចូលរួមពិធីលាគ្នាលើកចុងក្រោយ សម្រាប់ដំរីឯកោបំផុតនៅលើពិភពលោកឈ្មោះ កាវ៉ាន់ (Kaavan) មុនពេលវាហោះមកចាប់ផ្ដើមជីវិតថ្មីនៅក្នុងប្រទេសកម្ពុជានាសប្ដាហ៍នេះ។

ក្នុងពិធីកាលពីថ្ងៃម្សិលមិញនេះ មានការចូលរួមពីមន្ដ្រីជាន់ខ្ពស់ជាច្រើនរូប រួមមានមន្ដ្រីបរិស្ថាន និងសមាជិកសភាជាដើម។ នៅក្នុងនោះដែរ គេបានរៀបចំលម្អ រួមមានការចងប៉េងប៉ោងចម្រុះពណ៌ និងបដាដែលសរសេរថា « លាហើយកាវ៉ាន់ យើងនឹងនឹកឯង» ហើយប្រជាជនក៏បានថតរូបជាមួយកាវ៉ាន់ ខណៈតន្ដ្រីករបានធ្វើការសម្ដែង ក៏ដូចជាច្រៀងចំរៀងនៅក្បែរនោះផងដែរ។

គួរឲ្យដឹងថា កាវ៉ាន់នឹងត្រូវដឹកតាមយន្ដហោះមកកាន់ប្រទេសកម្ពុជា បន្ទាប់ពីវាត្រូវបានអ្នកឯកទេសអន្ដរជាតិធ្វើការហ្វឹកហាត់អស់រយៈពេលជាច្រើនសប្ដាហ៍ ដើម្បីឲ្យសុាំនឹងសំឡេងខ្លាំងៗ នៃការហោះហើររយៈពេល ១០ម៉ោងមកកម្ពុជា។

សូមបញ្ជាក់ថា សត្វដំរីដ៏កំសត់មួយក្បាលនេះ បានបញ្ចេញអាកប្បកិរិយាខុសប្រក្រតីហាក់បីដូចជាមានបញ្ហាផ្លូវចិត្ត បន្ទាប់ពីដៃគូរបស់វាឈ្មោះ Saheli បានស្លាប់តាំងពីឆ្នាំ ២០១២មកម្លេះ ហើយវាត្រូវនៅឯកោតែម្នាក់ឯង។ ដោយសារតែមូលហេតុទាំងអស់នេះ ទើបតុលាការប៉ាគីស្ថានសម្រេចឲ្យ កាវ៉ាន់ មកនៅជម្រកដែលសមរម្យមួយ ក្នុងប្រទេសកម្ពុជាយើងតែម្ដង៕

សូមទស្សនារូបភាពខាងក្រោម៖