សហរដ្ឋអាមេរិក បញ្ជូនយន្តហោះទម្លាក់គ្រាប់បែក B-52 ទៅមជ្ឈឹមបូព៌ា

វ៉ាស៊ីនតោន៖ យោធាសហរដ្ឋអាមេរិក បានដាក់ពង្រាយយន្តហោះទម្លាក់គ្រាប់បែក B-52 ទៅកាន់តំបន់មជ្ឈឹមបូព៌ាកាលពីថ្ងៃសៅរ៍​ ​បន្ទាប់ពីរដ្ឋបាល លោក ត្រាំ បានប្រកាសកាលពីប៉ុន្មានថ្ងៃមុន ស្តីពីគម្រោងដកកងទ័ពអាមេរិកមួយផ្នែកទៀត ពីអាហ្វហ្គានីស្ថាននិងអ៊ីរ៉ាក់។

បញ្ជាការកងទ័ពអាកាស​អាមេរិក​និយាយថា សមាជិកកងទ័ពអាកាសអាមេរិកនៃកងយន្តហោះ B-52H Stratofortress បាន​បំពេញបេសកកម្ម​​ដើម្បី «ផ្តល់ជា​ការជូនដំណឹង​ខ្លី» ​ក្នុងគោលបំណង​រារាំងការឈ្លានពាន ​ក៏ដូចជាធានាការពារដល់ដៃគូនិងសម្ព័ន្ធមិត្តរបស់សហរដ្ឋអាមេរិក។

គួររម្លឹកថា យន្តហោះទម្លាក់គ្រាប់បែករយៈចម្ងាយឆ្ងាយរបស់អាមេរិកមួយគ្រឿងនេះ ធ្លាប់មានវត្តមានចុងក្រោយក្នុងតំបន់មជ្ឈឹមបូព៌ា គឺនៅដើមឆ្នាំ ២០២០។ ហើយបេសកកម្មថ្មី ដែលចាប់ផ្តើមឡើងកាលពី​ថ្ងៃសៅរ៍កន្លងទៅនេះ គេក៏នៅមិនទាន់ទទួលបានរបាយការណ៍ ថាតើយន្តហោះបានធ្វើដំណើរទៅគោលដៅមួយណា នៅក្នុងតំបន់មជ្ឈឹមបូព៌ា៕