៦ប្រកួតរកបាន១០គ្រាប់! Zlatan បន្តឈរជា Top Scorer នៅ Serie A ក្រោយស៊ុតបាន២គ្រាប់យប់មិញ (មានវីដេអូ)

អ៊ីតាលី៖​ នៅក្នុងការប្រកួតក្របខ័ណ្ឌ Serie A សប្តាហ៍ទី៨ កាលពីរាត្រីថ្ងៃអាទិត្យម្សិលមិញនេះក្លិប  AC Milan អាចរកបានបីពិន្ទុបន្ថែមក្រៅដី ក្រោយយកឈ្នះ Napoli ដោយលទ្ធផល៣ទល់នឹង១។ 

ខ្សែប្រយុទ្ធចាស់វស្សាវ័យ៣៩ឆ្នាំ Zlatan Ibrahimović នៅតែបន្តបង្ហាញពីសមត្ថភាពរកគ្រាប់បាល់ដ៏អស្ចារ្យរបស់ខ្លួន ដោយស៊ុតបានពីរគ្រាប់បើកឆាកឲ្យ AC Milan នៅនាទីទី២០និង៥៤ មុនពេលដែល Napoli តាមពីក្រោយបានមួយគ្រាប់មកវិញនៅនាទីទី៦៣ដោយការស៊ុតរបស់កីឡាករ Dries Mertens ។ ដោយឡែកគ្រាប់ទី៣របស់ AC Milan រកបាននៅនាទីទី៩០+៥ទៅហើយ ដោយការស៊ុតរបស់កីឡាករ Jens Petter Hauge ។

ជាក់ស្តែងពីរគ្រាប់របស់ Zlatan យប់មិញនេះ ធ្វើឲ្យរូបគេបន្តឈរជាកីឡាករដែលរកគ្រាប់បាល់បានច្រើនជាងគេនៅ Serie A គិតត្រឹមសប្តាហ៍ទី៨នេះ ពោលរកបានសរុបចំនួន១០គ្រាប់ក្នុងការបង្ហាញខ្លួន៦ប្រកួត។ ហើយយោងតាមលទ្ធផលនេះ AC Milan បន្តឈរកំពូលតារាងមាន២០ពិន្ទុ តាមពីក្រោយដោយក្លិប Sassuolo​ ចំនួន២ពិន្ទុ៕

ប្រភព៖ bbc