បរទេស៖ ប៉ូលិសហូឡង់បានសាកសួរអ្នកស្រាវជ្រាវផ្នែកសុវត្ថិភាពម្នាក់ បន្ទាប់ពីបុរសម្នាក់នេះបានអះអាងថា គាត់បានចូលទៅក្នុងគណនីធ្វីតធ័ររបស់ប្រធានាធិបតី ដូណាល់ ត្រាំ ដោយជោគជ័យ តាមរយៈការទាយលេខសម្ងាត់។ កាលពីខែមុន អ្នកស៊ើបអង្កេតតាមអ៊ីនធឺណេតដ៏ល្បី ឈ្មោះ Victor Gevers បាននិយាយថា គាត់បានចូលទៅដល់គណនីធ្វីតធ័ររបស់លោក ត្រាំ ដោប្រើលេខសម្ងាត់ MAGA2020​។

សេតវិមានបានបដិសេធថា វាមិនបានកើតឡើងទេ ហើយខាងក្រុមហ៊ុនធ្វីតធ័របាននិយាយថា គ្មានភស្ដុតាងនៃការលួចចូលទេ។ ប៉ុន្តែលោក Gevers ឥឡូវនេះបានបង្ហាញព័ត៌មានបន្ថែមទៀត ដើម្បីគាំទ្រការអះអាងរបស់គាត់។ ជាផ្នែកមួយនៃការសួរចម្លើយរបស់ប៉ូលិស លោក Gevers បានទម្លាយឲ្យដឹងជាលើកដំបូងថា គាត់មានភស្ដុតាងជាច្រើននៃការលួចចូល ច្រើនជាងអ្វីដែលគាត់ធ្លាប់បញ្ចេញកាលពីមុន។

រូបថតអេក្រង់មួយបានបង្ហាញពី ព័ត៌មានរបស់លោក ត្រាំ ដែលអាចកែបាន នៅលើធ្វីតធ័រ

គាត់មិនបានបង្ហាញច្បាស់នូវព័ត៌មានដែលគាត់មាននោះទេ ប៉ុន្តែការចូលទៅក្នុងគណនីរបស់នរណាម្នាក់ អាចនឹងដឹងពីរឿងរ៉ាវទាំងនេះដូចជា មើលនិងផ្ញើសារលក្ខណៈឯកជន មើលការបង្ហោះដែលម្ចាស់ដើមបានលាក់ជាលក្ខណៈឯកជន និងអាចទទួលបានព័ត៌មានផ្សេងៗទាក់ទងនឹងការប្លុក (block) អ្នកណាម្នាក់ផងដែរ។ ពួកគេថែមទាំងអាចទាញយករាល់ទិន្នន័យទាំងឡាយរបស់ម្ចាស់ដើម រួមបញ្ចូលទាំងរូបភាពនានានិងសារ។

លោក Victor Gevers

ប៉ូលិសត្រូវតែរកភស្ដុតាងឲ្យច្បាស់ មុននឹងបញ្ជាក់ថា ការលួចចូលនេះពិតជាកើតមានពិតមែន។ ប្រសិនបើព្រះរាជអាជ្ញាចាត់ទុកថា សកម្មភាពរបស់លោក Gevers ជារឿងខុសច្បាប់ នោះលោកអាចនឹងប្រឈមការជាប់ពន្ធនាគាររហូតដល់ទៅ៤ឆ្នាំ។ លោក Gevers បានប្រាប់អ្នកយកព័ត៌មានអំពីការលួចចូលរបស់គាត់ នៅថ្ងៃទី២២ ខែតុលា។ គួរបញ្ជាក់ផងដែរថា ឥឡូវនេះ គណនីធ្វីតធ័ររបស់លោក ដូណាល់ ត្រាំ មានអ្នកតាមដាន ប្រមាណ៨៩លាននាក់៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]