បរទេស៖ របាយការណ៍ថ្មីមួយរបស់ចិនបានចេញកាលពីប៉ុន្មានថ្ងៃមុន បានឲ្យដឹងថា ក្រុមហ៊ុន Apple បានចាប់ផ្ដើមបញ្ជូនទូរសព្ទ iPhone អេក្រង់បត់របស់ខ្លួន ទៅដៃគូដំឡើងគឺក្រុមហ៊ុន Foxconn ក្នុងគោលបំណងធ្វើតេស្ដសាកល្បង ដោយគ្រោងនឹងបញ្ចេញនៅខែកញ្ញា ឆ្នាំ២០២២។

ដកស្រង់ប្រភពចេញពីសារព័ត៌មាន Economic Daily News បានលើកឡើងថា ការធ្វើតេស្ដក៏រួមបញ្ចូលទាំងការប្រើប្រាស់បច្ចេកវិទ្យាអេក្រង់ OLED ឬ Micro-LED ពីព្រោះជម្រើសនៃអេក្រង់ទាំងពីរអាចនឹងប៉ះពាល់ដល់វិធីសាស្ត្រ នៃការដំឡើង។

ក្រុមហ៊ុន Apple ក៏បាននិយាយជាមួយក្រុមហ៊ុន Foxconn ក្នុងការធ្វើតេស្ដភាពធន់នៃការបើកបិទអេក្រង់ ជាមួយឧបករណ៍នេះ ដោយធ្វើការបើកបិទសាកល្បងជាង១០០,០០០ដង។ របាយការណ៍បានកត់សម្គាល់ការធ្វើតេស្ដស្រដៀងគ្នានេះថា កុំព្យទ័រយួរដៃជាធម្មតាតម្រូវឲ្យមានការបើកបិទ ចន្លោះពី២០,០០០ទៅ៣០,០០០ដង។

គំរូ iPhone អេក្រង់បត់ (ចចាមអារ៉ាម)

របាយការណ៍មិនបានផ្ដល់ព័ត៌មានបន្ថែមស្ដីពីការរចនានៃឧបករណ៍ ដែលអាចបត់បាននោះទេ ប៉ុន្តែបានបញ្ជាក់ថា ក្រុមហ៊ុន Samsung ជាអ្នកផ្គត់ផ្គង់បន្ទះអេក្រង់ទាំងនេះ ដែលកន្លងមកធ្លាប់មានពាក្យចចាមអារ៉ាមថា Apple បានបញ្ជាទិញគំរូអេក្រង់បត់ពីក្រុមហ៊ុនកូរ៉េមួយនេះ។

បើយោងតាមអ្នកបែកធ្លាយ លោក Jon Prosser បានឲ្យដឹងថា Apple កំពុងធ្វើតេស្ដម៉ូឌែល iPhone ដែលអាចបត់បាន ដែលមានបន្ទះអេក្រង់ពីរផ្សេងគ្នា ដោយដាក់ភ្ជាប់គ្នា ជាជាងបន្ទះអេក្រង់តែមួយដែលអាចបត់បាន ដូចជា Galaxy Fold របស់ក្រុមហ៊ុន Samsung៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]