ភ្នំពេញ ៖  នៅក្នុងជំនួបវគ្គពាក់កណ្ដាលផ្ដាច់ព្រ័ត្រ កម្មវិធីប្រដាល់គុនខ្មែរស្របៀរកម្ពុជា នៅស្ថានីយ៍ទូរទស្សន៍  CNC  ពូលA ត្រូវបានរកឃើញបេក្ខភាព២រូប ដែលនឹងត្រូវប្រកួតគ្នានៅវគ្គផ្ដាច់ព្រ័ត្រហើយ ដើម្បីយកអ្នកលេខ១ រង់ចាំអ្នកលេខ១ ពូលB ធ្វើការប្រកួតគ្នាដណ្ដើមខ្សែក្រវាត់។

ក្នុងនោះ កីឡាករ បឺត សង្ឃឹម ដែលបានផ្ដួលកីឡាករ យុគ យក្សផ្លែ ឱ្យបោះបង់ការប្រកួតក្នុងទឹកទី៤ នឹងត្រូវប៉ះគ្នានៅវគ្គផ្ដាច់ព្រ័ត្រពូល A ជាមួយនឹង កីឡាករ វ៉ាន់ វឿន ដែលបានផ្ដួលកីឡា សេន កុសល ឱ្យសន្លប់ក្នុងទឹកទី៣ ក្រោមផ្លែជង្គង់ដ៏មុតស្រួច របស់គេបានចាក់ទៅលើ កុសល ឆ្អល់រមួលពេញសង្វៀន ។

ចំពោះប្រវត្តិជួបគ្នារវាងកីឡាករទាំងពីរ ក្នុងរយៈពេលចុងក្រោយនេះមានចំនួន៤លើក ដោយលើកទី១ បឺត សង្ឃឹម ធ្លាប់បានស្ដាយបោកខ្លួនម្ដងរួចហើយ ដោយពេលនោះ វ៉ាន់ វឿន បានយកឈ្នះខ្លួន នៅវគ្គដណ្ដើមខ្សែក្រវាត់ គោជល់ ឆ្នាំ២០១៩ ។ ហើយ៣ប្រកួតទៀត វ៉ាន់ វឿន គឺត្រូវបានបឺត សង្ឃឹម វ៉ៃសន្លប់រហូត ។

គូនេះអាចចាត់ទុកថា ជាគូសងសឹក និងជាគូជក់ចិត្តបំផុតប្រចាំចុងឆ្នាំ២០២០នេះ ហើយក៏ជាការប្រកួតស្វែងរកអធិរាជជើងខ្លាំងក្នុងប្រភេទទម្ងន់៥៧គីឡូក្រាមផងដែរ ។ ដូច្នេះតើ វ៉ាន់ វឿន នឹងជាន់ដានប្រវត្តិសាស្ត្រដដែលៗនេះទៀត ឬក៏អាចកែប្រវត្តិសាស្ត្រនេះបាន ទាំងដែល៤ប្រកួតចុងក្រោយ ខ្លួនឈ្នះតែម្ដងគត់ និងចាញ់សន្លប់រហូតទៅដល់៣ដងឯណោះ ៕

ប្រភពវីដេអូ៖​ MSR

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]