ខលហ្គេត បានឧបត្ថម្ភសាប៊ូលាងដៃរាប់សិបលានដុំទៅកាន់ពិភពលោករួមទាំងកម្ពុជា ដើម្បីប្រឆាំងនឹងកូរីដ-១៩ ក្នុងយុទ្ធនាការ #SafeHands Challenge របស់អង្គការសុខភាពពិភពលោក!

ភ្នំពេញ៖ ដោយមូលហេតុនៃជំងឺរាតត្បាតសកលកូរីដ-១៩ នៅតែចោទជាបញ្ហាសម្រាប់សុខភាពសាធារណៈ និងកំពុងរីករាលដាលពាសពេញពិភពលោកនាពេលបច្ចុប្បន្ននេះ  ក្រុមហ៊ុនខលហ្គេតបានឧបត្ថម្ភសាប៊ូលាងសម្អាតដៃ ចំនួន ២៥លានដុំ ទៅកាន់ពិភពលោក រួមទាំងប្រទេសកម្ពុជាបានទទួលសាប៊ូសរុប ចំនួន២៥ម៉ឺនដុំ ក្រោមយុទ្ធនាការ #SafeHands Challenge របស់អង្គការសុខភាពពិភពលោក ដើម្បី លើកទឹកចិត្ត ប្រជាជនទាំងអស់ ថែរក្សាការពារ សុវត្ថិភាពដៃរបស់ខ្លួន។

យោងតាមសេចក្តីប្រកាសព័ត៌មានរបស់ក្រុមហ៊ុនខលហ្គេតបានអោយដឹងថា ដើម្បីចូលរួមទប់ស្កាត់និងប្រឆាំងការឆ្លងនៃជំងឺកូរីដ-១៩ ដែលមិនទាន់សាបរលាបនោះ អង្គការសុខភាពពិភពលោកបានចាប់ផ្តើមធ្វើយុទ្ធនាការ #SafeHands Challenge នៅលើបណ្តាញសង្គមទូទាំងពិភពលោក ដើម្បីលើកទឹកចិត្តប្រជាជនទាំងអស់ឱ្យយល់កាន់តែច្បាស់ពីការការពារ និងថែរក្សាដៃឲ្យមានសុវត្ថិភាព។ យុទ្ធនាការនេះក៏មានការចូលរួមពីតារាល្បីៗលំដាប់ពិភពលោក ដែលមាន កញ្ញា Selena Gomez និង លោក Gordon Ramsay ផងដែរ ដោយពួកគាត់បានជួយចែកចាយបន្ត និងលើកទឹកចិត្តឱ្យប្រជាជនទូទាំងពិភពលោក ធ្វើការលាងសម្អាតដៃឱ្យបានត្រឹមត្រូវ តាមរយៈវិដេអូអប់រំរបស់ពួកគាត់។

ដើម្បីឆ្លើយតប និងចូលរួមក្នុងយុទ្ធការរបស់អង្គសុខភាពពិភពលោក ក្រុមហ៊ុន ខលហ្គេត បានចូលរួម និងចែកចាយយុទ្ធនាការ #SafeHands Challenge ដោយបានផលិតសាប៊ូចំនួន ២៥ លានដុំដើម្បីគាំទ្រដល់កិច្ចខិតខំប្រឹងប្រែងរបស់អង្គការសុខភាពពិភពលោក ហើយសាប៊ូចំនួន ២៥ម៉ឺនដុំ ត្រូវបានបរិច្ចាគដល់ប្រជាជនដែលកំពុងត្រូវការនៅកម្ពុជា ដើម្បីជួយបញ្ឈប់ការរីករាលដាលនៃជំងឺរាតត្បាតកូវីដ-១៩ តាមរយៈមូលនិធិកុមាររបស់អង្គការសហប្រជាជាតិ (យូនីសេហ្វ)។ ក្នុងនោះសាប៊ូជាច្រើនដុំក្នុងចំណោម ២៥ម៉ឺនដុំ បានចែកចាយរួចរាល់ពាសពេញប្រទេសកម្ពុជា តាមរយៈក្រសួងអភិវឌ្ឍន៍ជនបទ និងអាជ្ញាធរថ្នាក់ក្រោមជាតិ ទៅកាន់ ខេត្តចំនួន៥ ដូចជា ខេត្តតាកែវ ខេត្តរតនគិរី ខេត្តកំពង់ស្ពឺ ខេត្តស្វាយរៀង ខេត្តព្រះវិហារ និងខេត្តក្រចេះ ក្នុងតំបន់ដាច់ស្រយាល។

ក្នុងសេចក្តីប្រកាសដដែលរបស់ក្រុមហ៊ុនមួយនេះបានអោយដឹងទៀតថា ខលហ្គេត កំពុងគាំទ្រយុទ្ធនាការនេះយ៉ាងពេញទំហឹង ដូចដែលខ្លួនបានប្តេជ្ញាចិត្តចំពោះប្រជាជន និងសង្គមកម្ពុជា ។ ខលហ្គេតសូមលើកទឹកចិត្តប្រជាជនឱ្យលាងសម្អាតដៃឱ្យបានត្រឹមត្រូវ និងសុវត្ថិភាព ពីវីរុស បាក់តេរី និងមេរោគដែលបង្កគ្រោះថ្នាក់ផ្សេងៗទៀត ។ ក្រុមហ៊ុនជឿជាក់ថា ទាំងអស់គ្នានឹងមានអនាគតល្អប្រសើរ ជាមួយស្នាមញញឹមរួមគ្នានាពេលអនាគតដ៏ខ្លីខាងមុខនេះ៕