មរណភាពរបស់ តារាហុងកុង Savio Tsang មិនមានពិធីបុណ្យសពទេ ព្រោះតែ...

ហុងកុង៖ កាលពីថ្ងៃទី ១៦ ខែវិច្ឆិកា យោងតាម ទំព័រ Sina បានរាយការណ៍ថា ប្អូនស្រីរបស់ តារាសម្ដែងប្រុសហុងកុង លោក Savio Tsang បានបង្ហោះវីដេអូឃ្លីប នៅលើបណ្តាញសង្គម ដោយបានបង្ហាញពីសេចក្តីប្រាថ្នាចុងក្រោយនៃឆាកជីវិតរបស់តារាសម្តែងប្រុសរូបនេះ មុនពេលទទួលមរណភាព ។

នៅក្នុងនោះដែរ ប្អូនស្រីរបស់ តារាសម្ដែងប្រុសរូបនេះ បានរៀបរាប់ថា រូបលោកបានចាកចេញដោយសន្តិភាព និងគ្មានបញ្ហាអ្វីទាំងអស់។ ក្នុងនាមជាមនុស្សដែលចូលចិត្តភាពស្ងៀមស្ងាត់ ខ្លាចសំឡេងរំខាន ព្រមទាំងមិនចូលចិត្តចេញសង្គមទៀត ដូច្នេះហើយ លោកក៏បានប្រាប់មិត្តភក្តិរបស់លោក នៅក្នុងថ្ងៃដែលបានស្លាប់ ដោយមិនចាំបាច់ធ្វើពិធីបុណ្យសពនោះទេ ។

ម៉្យាងវិញទៀត ប្អូនស្រីរបស់លោក ក៏បានថ្លែងអំណរគុណ ដល់ក្រុមគ្រូពេទ្យ និងសិល្បករជាច្រើន ដែលបានជួយនិងគាំទ្រអស់ពីដួងចិត្ត ចំពោះ លោក Savio Tsang ទាំងរាងកាយ និងបញ្ញាស្មារតី នៅក្នុងអំឡុងពេល ដែលតារាប្រុសកំំពុងតែតស៊ូនឹងជំងឺដ៏ធ្ងន់ធ្ងរ​ ។

គួរបញ្ជាក់ផងដែរថា កាលពីថ្ងៃទី ១៤ ខែវិច្ឆិកា ខាងប្រព័ន្ធផ្សព្វផ្សាយហុងកុង បានរាយការណ៍ឲ្យដឹងថា លោក Savio Tsang បានទទួលមរណភាព ក្នុងអាយុ ៥៨ ឆ្នាំ ដោយជំងឺមហារីកសួត និងបានលាចាកលោក នៅល្ងាចថ្ងៃទី ១៣ ខែវិច្ឆិកា ផងដែរ។

សូមទស្សនារូបភាពខាងក្រោម៖