គួរឲ្យភ្ញាក់ផ្អើល! ការសិក្សាថ្មីបានបញ្ជាក់ថា ប្រព័ន្ធព្រះអាទិត្យរបស់យើងកកើតយ៉ាងឆាប់រហ័ស ក្នុងរយៈពេលតិចជាង២០ម៉ឺនឆ្នាំ

បរទេស៖ បើយោងតាមការសិក្សាថ្មីមួយបានបង្ហាញថា ប្រព័ន្ធព្រះអាទិត្យរបស់យើងគឺមានទំហំធំ ប៉ុន្តែប្រើពេលកកើតយ៉ាងឆាប់រហ័ស។ តាមរយៈការវិភាគអ៊ីសូតូបដែលមានអាយុរាប់ពាន់លានឆ្នាំ លើអាចម៍ផ្កាយមួយ អ្នកវិទ្យាសាស្ត្រនៅមន្ទីរពិសោធន៍ជាតិ Lawrence Livermore National Laboratory បានកំណត់ថា ព្រះអាទិត្យនិងផ្នែកផ្សេងទៀតនៃប្រព័ន្ធផ្កាយរបស់យើង ត្រូវបានបង្កើតឡើងក្នុងរយៈពេលតិចជាង២០០,០០០ឆ្នាំ។

ក្រុមអ្នកស្រាវជ្រាវធ្លាប់គិតថា ការវិវឌ្ឍនៃប្រព័ន្ធព្រះអាទិត្យរបស់យើងប្រើពេលយ៉ាងហោចណាស់ ជិតមួយលានទៅពីរលានឆ្នាំ ដោយផ្អែកលើការកកើតរបស់ប្រព័ន្ធផ្កាយនានា។ ការពិតទៅ ពេលវេលានៃកំណើតរបស់ប្រព័ន្ធព្រះអាទិត្យកាលពីមុន មិនត្រឹមត្រូវនោះទេ។ ការសិក្សាថ្មីបានច្រានចោលគំនិតពីមុន ដែលនាំឲ្យមានការបង្កើតប្រព័ន្ធព្រះអាទិត្យយ៉ាងរហ័ស ក្នុងរយៈពេលតិចជាង២០០,០០០ឆ្នាំ។

ប្រព័ន្ធព្រះអាទិត្យរបស់យើងបានចាប់កំណើតឡើង ប្រហែលជា៤.៥ប៊ីលានឆ្នាំមុន មុនពេលការសាបរលាបនៃពពកដ៏ក្រាស់នៃឧស្ម័ននិងធូលី។ ក្រុមអ្នកវិទ្យាសាស្ត្របានកំណត់អាយុកាល ម៉ូលីដែនអ៊ីសូតូប នៅលើអាចម៍ផ្កាយប្រភេទ chondrite រួមទាំងអាចម៍ផ្កាយ Allende ដែលជាប្រភេទ chondrite យ៉ាងធំ ត្រូវបានរកឃើញនៅលើផែនដី នៅពេលវាធ្លាក់ចំទីក្រុង Chihuahua ប្រទេសម៉ិចស៊ិក ក្នុងឆ្នាំ១៩៦៩។

អាចម៍ផ្កាយទាំងនេះសម្បូរដោយជាតិកាល់ស្យូម-អាលុយមីញ៉ូម ដែលជាធាតុមានវ័យចំណាស់ ក្នុងប្រព័ន្ធព្រះអាទិត្យរបស់យើង។ អ្នកវិទ្យាសាស្ត្រនៅមន្ទីរពិសោធន៍បានវិភាគ ម៉ូលីដែនអ៊ីសូតូប ហើយកំណត់បានថា វាបានបង្កើតឡើងដោយប្រើពេលប្រហែល ៤០,០០០ទៅ២០០,០០០ឆ្នាំ។ នេះមានន័យថា ប្រព័ន្ធព្រះអាទិត្យរបស់យើង ក៏ចំណាយពេលកកើតក្នុងរយៈពេលដូចគ្នានេះដែរ៕