អាមេរិកព្រមព្រៀងលក់អាវុធទំនើបឱ្យអារ៉ាប់រួម ក្នុងទំហំទឹកប្រាក់សរុប ២៣.៣៧ពាន់លានដុល្លារ

វ៉ាស៊ីនតោន៖ ទីភ្នាក់ងារសហប្រតិបត្តិការសន្តិសុខការពារជាតិ (DSCA) បានប្រកាសកាលពីថ្ងៃអង្គារថា ក្រសួងការបរទេសអាមេរិក​ បានយល់ព្រមលើកិច្ចព្រមព្រៀងលក់អាវុធទំនើបៗចំនួន ៣ប្រភេទ ទៅឱ្យប្រទេស​​អេមីរ៉ាតអារ៉ាប់រួម ដែលគិតជាចំនួនទឹកប្រាក់សរុប ២៣.៣៧ពាន់លានដុល្លារ។

ទីភ្នាក់ងារ DSCA បាន​ចេញសេចក្តីប្រកាសចំនួន ៣ កាលពីថ្ងៃអង្គារ ទាក់ទងទៅនឹងកិច្ចព្រមព្រៀងដែលបានស្នើ ដោយក្នុងនោះរួមមាន ថវិកា ១០.៤ពាន់លានដុល្លារ សម្រាប់ទិញយន្តហោះចម្បាំងប្រភេទ F-35A ចំនួន ៥០គ្រឿង រួមជាមួយឧបករណ៍ជំនួយដល់ការហោះហើរនិងចុះចត។ ថវិកា ១០ពាន់លានដុល្លារ សម្រាប់ទិញមីស៊ីលចំងាយ​មធ្យម AIM-120C8 (AMRAAM) ចំនួន ៨០គ្រាប់ សម្រាប់បំពាក់លើយន្តហោះចម្បាំង។ ចំណែកថវិកា ២.៩៧ពាន់លានដុល្លារ ​គឺសម្រាប់ទិញយន្តហោះគ្មានមនុស្សបើកបំពាក់អាវុធទំនើប​ ប្រភេទ MQ-9B ចំនួន ១៨គ្រឿង។

គួរជម្រាបថា កាលពីចុងខែតុលាកន្លងទៅនេះ សេតវិមានបានជូនដំណឹងក្រៅផ្លូវការមួយ ដល់សភាស្តីអំពីសំណើលក់យន្តហោះ F-35 ចំនួន ​៥០គ្រឿង ដល់ប្រទេសអារ៉ាប់រួម ក្នុងចំនួនទឹកប្រាក់ ១០.៤ពាន់លានដុល្លារ​ ដែលនឹងធ្វើឱ្យប្រទេសនេះក្លាយជាប្រទេសទី២ នៅមជ្ឈឹមបូព៌ា បន្ទាប់ពីប្រទេសអ៊ីស្រាអែល ​​ដែលក្លាយជាម្ចាស់យន្តហោះអាមេរិកប្រភេទនេះ៕