កូរ៉េខាងត្បូង ដាក់បង្ហាញនាវាមុជទឹកថ្មី ទម្ងន់៣ពាន់តោន

សេអ៊ូល៖ កូរ៉េខាងត្បូងបានរៀបចំពិធីមួយ ​ដើម្បីដាក់​បង្ហាញនាវាមុជទឹកជំនាន់ថ្មីរបស់ខ្លួន ឈ្មោះថា Ahn Mu ដែលមានទម្ងន់ ៣,០០០តោន​ ​និងមានសមត្ថភាពបាញ់មីស៊ីលផ្លោងបាលីស្ទីកបាន។

ប្រមុខការពារជាតិទីក្រុងសេអ៊ូល លោក Suh Wook បាននិយាយ​កាលពីថ្ងៃអង្គារ​ថា នាវាមុជទឹកដើរដោយថាមពលម៉ាស៊ូតនេះ បាននាំមកនូវមោទនភាពដល់យោធាកូរ៉េខាងត្បូង។ ​បន្ថែមពីនេះ លោកក៏បាន​ថ្លែងអំណរគុណដល់យុទ្ធជនការពារឯករាជ្យរបស់កូរ៉េ ដែលបាន​បូជាជីវិតក្នុងអំឡុង​អាណានិគមរបស់ជប៉ុននៅឧបទ្វីបនេះ។

ពិធីដាក់បង្ហាញនាវាមុជទឹក Ahn Mu ត្រូវបានធ្វើឡើងនៅឯកំពង់ផែមួយរបស់ក្រុមហ៊ុនផលិតនាវា Okpo Shipyard of Daewoo Shipbuilding and Marine Engineering Co. ដែលស្ថិតនៅភាគអាគ្នេយ៍​ទីក្រុង Geoje ។

Ahn Mu គឺនាវាមុជទឹកលំដាប់ទី២ ក្នុងចំណោមនាវាមុជទឹកទម្ងន់ ៣,០០០តោន ចំនួន ៣គ្រឿង ដែលកូរ៉េខាងត្បូងគ្រោងនឹងសាងសង់នៅឆ្នាំ ២០២៣ ជាមួយនឹងបច្ចេកវិទ្យាផ្ទាល់ខ្លួន ក្រោមគម្រោងថវិកា ២.៧៧ ពាន់លានដុល្លារអាមេរិក​ ដែលបានចាប់ដំណើរការកាលពីឆ្នាំ ២០០៧។ ​ហើយ​នាវាមុជទឹកទី១ ឈ្មោះថា Dosan Ahn Chang-ho ដែល​គេដាក់​តេស្តសាកល្បងកាលពីឆ្នាំ ២០១៨ គឺរំពឹងថានឹងត្រូវដាក់ឱ្យប្រតិបត្តិការពេញលេញនៅចុងឆ្នាំនេះ។

គួរជម្រាបដែរថា​ នាវាមុជទឹក Ahn Mu មានបណ្តោយ ៨៣.៣ម៉ែត្រ និងទទឹង ៩.៦ម៉ែត្រ។​ វាមានសមត្ថភាពអាចផ្ទុកនាវិកចំនួន ៥០នាក់ និងអាចធ្វើប្រតិបត្តិការក្រោមផ្ទៃទឹកបាន ២០ថ្ងៃ ដោយមិនចាំបាច់​ចូលសំចតឡើយ។ ​​នាវាមុជទឹកនេះ គ្រោងនឹង​ដាក់ឱ្យប្រើប្រាស់ក្នុងជួរកងទ័ពជើងទឹកកូរ៉េខាងត្បូង នៅឆ្នាំ២០២២ បន្ទាប់ពីបញ្ចប់ការធ្វើតេស្តសាកល្បង៕