សហរដ្ឋអាមេរិកបំបែកកំណត់ត្រាថ្មី រកឃើញអ្នកឆ្លងកូវីដ-១៩ ដល់ជាង«១០ម៉ឺននាក់»ក្នុងមួយថ្ងៃ

សហរដ្ឋអាមេរិក៖ កាលពីថ្ងៃពុធ ទី០៤ ខែវិច្ឆិកា ឆ្នាំ២០២០ សហរដ្ឋអាមេរិកបានកត់ត្រាករណីឆ្លងជំងឺកូវីដ-១៩ រហូតដល់ជាង ១០៣,០០០នាក់ក្នុងមួយថ្ងៃ ដែលជាចំនួនច្រើនបំផុត និងមិនធ្លាប់មានចាប់តាំងពីប្រទេសនេះ ត្រូវបានវីរុសរាតត្បាត។ នេះបើយោងតាមការចុះផ្សាយរបស់សារព័ត៌មាន Business Inside។

ករណីឆ្លងសរុបកាលពីថ្ងៃម្សិលមិញ បានកើនឡើងលើសកំណត់ត្រាប្រចាំថ្ងៃពីមុន ហើយក្នុងរយៈពេល៧ថ្ងៃ ជាមធ្យមគឺមានប្រហែល ៨៦,៣៦៣នាក់ប៉ុណ្ណោះ។ ទន្ទឹមនឹងនេះ បើយោងតាមទិន្នន័យពីសកលវិទ្យាល័យ Jonh Hopkins បានឲ្យដឹងដែរថា ចំនួនអ្នកឆ្លងថ្មីនេះ ច្រើនជាងពីរដងនៃកំណត់ត្រាដែលបានកើតឡើង កាលពីថ្ងៃទី៤ ខែកញ្ញាកន្លងទៅ គឺទើបតែ២ខែមុនប៉ុណ្ណោះ។

រហូតមកទល់ពេលនេះ សហរដ្ឋអាមេរិកនៅតែឈរលើកំពូលតារាង ជាប្រទេសដែលរងគ្រោះខ្លាំងជាងគេបំផុតក្នុងពិភពលោក ដោយមានអ្នកស្លាប់ជាង ២៣៣,៦៥០នាក់ និងជាសះស្បើយប្រហែល ៦លាននាក់ ក្នុងចំណោមអ្នកឆ្លងសរុបប្រមាណ ៩.៥លាននាក់។

យ៉ាងណាមិញ ក្រុមអ្នកជំនាញ រួមទាំងលោកវេជ្ជបណ្ឌិត Deborah Birx ដែលជាសមាជិកម្នាក់នៃក្រុមគ្រូពេទ្យប្រចាំសេតវិមាន បានព្រមានថា «ករណីស្លាប់ច្រើនបំផុតនៅសហរដ្ឋអាមេរិក កំពុងខិតចូលមកដល់ហើយ»។

ដោយឡែក លោកបណ្ឌិត Anthony Fauci ដែលជាអ្នកជំនាញខាងជំងឺឆ្លងឈានមុខគេនៅសហរដ្ឋអាមេរិក​ ក៏បានព្រមានផងដែរថា រដូវរងារនាពេលខាងមុខអាចនឹងបង្កគ្រោះមហន្ដរាយ ធ្វើឲ្យករណីឆ្លងនិងស្លាប់កើតឡើងកាន់តែច្រើន បើសិនមិនអនុវត្ដវិធានការតឹងរ៉ឹងបន្ថែម ដើម្បីទប់ស្កាត់ការរីករាលដាលនោះទេ។ ខណៈ គ្រូពេទ្យ និងមន្ដ្រីសុខភាពសាធារណៈ បានឲ្យដឹងមុនថា មន្ទីរពេទ្យរបស់ពួកគេប្រហែលមិនអាចគ្រប់គ្រងការហូរចូលនៃអ្នកជំងឺបានទេ ដោយនៅតំបន់ខ្លះ មន្ទីរពេទ្យក៏ជិតពេញផងដែរ៕