ក្រសួងសុខាភិបាល នៅថ្ងៃ ៥ វិច្ឆិកានេះ បានអំពាវនាវសារជាថ្មីម្តងទៀតដល់ពលរដ្ឋទាំងអស់ បន្តអនុវត្តឲ្យបានខ្ជាប់ខ្ជួននូវវិធានការការពារខ្លួនពីកូវីដ១៩ ដោយត្រូវពាក់ម៉ាស់ (ក្នុងករណីចាំបាច់) ជាពិសេសនៅពេលចល័តធ្វើដំណើរ និងពេលជួបមនុស្សច្រើន។ ហើយប្រើកន្សែង ឬក្រម៉ាខ្ទប់មាត់ ពេលក្អកកណ្តាស់ សម្អាតដៃជាប់ជាប្រចាំ រក្សាសុវត្ថិភាពសង្គម និងរក្សាគម្លាតសុវត្ថិភាពបុគ្គល ពីមួយម៉ែត្រកន្លះឡើង ដើម្បីចៀសវាងការចម្លងវីរុសកូវីដ-១៩ ដែលអាចកើតមានឡើងគ្រប់ពេលវេលាគ្រប់កាលៈទេសៈ និងគ្រប់ទីកន្លែង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាការកត់សម្គាល់ ការអំពាវនាវជាថ្មីរបស់ក្រសួងសុខាភិបាលយ៉ាងដូច្នេះ ធ្វើឡើងក្រោយពីក្រសួងសុខាភិបាលទទួលបានព័ត៌មានស្តីពីករណីវិជ្ជមានវីរុសកូវីដ-១៩ របស់រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី ដែលទើបនឹងបញ្ចប់ដំណើរទស្សនកិច្ចនៅកម្ពុជាកាលពីថ្ងៃ ៣ វិច្ឆិកាកន្លងទៅថ្មីៗ។
ក្រៅពីនេះ ក្រសួងបានរកឃើញថា ថ្នាក់ដឹកនាំ និងអ្នកពាក់ព័ន្ធដែលបានប៉ះពាល់ជាមួយរដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រីមានចំនួន ៦២៨នាក់។ សម្រាប់លទ្ធផលធ្វើតេស្តអ្នកទាំង ៦២៨នាក់ខាងលើ គឺអវិជ្ជមានវីរុសកូវីដ-១៩ ទាំងអស់។
យ៉ាងណា រាជរដ្ឋាភិបាលកម្ពុជាបានសម្រេចឲ្យថ្នាក់ដឹកនាំ និងមន្ត្រីទាំងអស់ដែលជួបទំនាក់ទំនងជាមួយប្រតិភូហុងគ្រី ត្រូវដាក់ឲ្យនៅដាច់ដោយឡែក (ចត្តាឡីស័ក) តាមការកំណត់របស់ក្រសួងសុខាភិបាល៕